Namminersorlutik Oqartussanit tusagassiorfinnut nalunaarut.
Ullormi 3. september 2022-mi Namminersorlutik Oqartussat SIK-llu isumaqatiginninniartartui SIK-p isumaqatigiissutaasa tamarmik nutarternissaanut isumaqatigiissuteqarput. Illuatungeriit oqaaseqarput: “Sivisusimaqaaq, angusaqarfiusumilli isumaqatigiinniarsimavugut.
Pitsanngorsagassat isiginiarsimavagut – aningaasarsiaannaat pinngikkaluarlugit atorfininnermi atugassarititaasut pingaaruteqartut allat aamma angusaqarniarfigivagut”.
Ilaqutariinnut arnanullu pissutsit pitsaanerulersut.
Ilaqutariit amerligaangami SIK-p isumaqatigiissutai naapertorlugit atorfillit sulinngiffeqarsinnaatitaapput, naartunermi, ernereernerup kingorna qitornavissiartaarnermilu sulinngiffeqarnerminni tamakkiisumik akissarsiaqarsinnaalissapput. Tamanna SIK-p ukiuni kingullerni eqqarsaatersuutigisimavaa. Maannamut arnat SIK-p isumaqatigiissutai naapertorlugit atorfeqartut sap. ak. 18 ernereernerup kingorna sulinngiffeqarnerminut akissarsiaqariarlutik ernereernerup kingorna ullormusiaqartussanngortarsimapput. Massakkumiit arnat SIK-p isumaqatigiissutai naapertorlugit atorfeqartinneqartut isertitaqarnerminnik pitsaanerungaartumik inissisimalissapput, tassami ernereernerup kingorna sap. ak. 40-t tungaannut tamakkiisumik akissarsiaqartassammata. Saniatigut piffissani taakkunani soraarnerussutisiaqarnissamut katersuisalissapput.
Ilinniarsimasunut innuttaasunillu sullissisunik ukkassineq.
Isumaqatigiissutit illuatungeriinnit nutarterneqarnerat SIK-p isumaqatigiissutai naapertorlugit atorfeqartunut tamanut tunngaviusumik akissarsiaanik pitsaanerulersitsipput. Isumaqatiginninniarnerup sivisulaarnerusumik ingerlasimasumi illuatungeriit SIK-p isumaqatigiissutai naapertorlugit atorfillit ilaatigut inunnut sullissisut ilinniarsimasullu immikkut isiginiarneqarsimapput. Tassani pineqartut ilagaat nunaqarfinni peqqinnissaqarfimmi sulisut, isumaginninnermut ikiortit, arnarsiat, talittarfinni mittarfinnilu sulisut assigisaallu akissarsiatigut immikkut qaffaavigineqarput.
Angalanissamut periarfissagissaarnerulerneq
SIK-p isumaqatigiissutai naapertorlugit atorfillit atorfininnermi inoqutigiittut angalanissaminut akiliunneqarsimasut massakkumiit soraarniuteqarnerminni angerlarnissaminnut akiliunneqartalernissaat immikkut pisussaaffeqarnissaat anguneqarpoq. Qanigisaasup pinartumik nappaateqarnerani imaluunniit toqukkut qimagunnerani kiffaanngissuseqarluni akissarsiaqartitaanissaat siusinnerusumik pisalernissaa illuatungeriinniit aamma isumaqatigiissutigineqarpoq. Taakkua saniatigut SIK-mi isumaqatigiissutit malillugit qaammammusialittut atorfeqartunut ilaqutaasunullu akiliunneqarluni angalanissamut, sulinngiffeqarluni angalanissamut akiliunneqarnissamut aningaasaateqarfimmik immikkut pilersitsiffigineqartussamut tapiissuteqarfigineqartalernissaanik periarfissiisoqassaaq.
Utoqqalinissamut aningaasaateqarnerulerneq.
SIK pisortanilu suliffeqarfiit tapit soraarnerussutisiaqaataasinnaasut amerlineqarnissaat qitiutissimavaat. Tamanna SIK-p isumaqatigiissutai naapertorlugit atorfeqartut soraarninngornissaminnut aningaasaqarnermikkut inissisimalluarnissaanik qulakkeerinnissaaq.
Angusap akuerinera.
Pitsaanerulersitsinerit ataatsimut katillugit 128,2 mio kr.-nik naleqarput. Tassa imaappoq, SIKmi akissarsiat nalingi ataatsimut katillugit 8 %-inik qaffattut. Isumaqatigiissutiginninnerup inerneri SIK-mi ilaasortanut taasisoqarfigisassanngorlugit nassiunneqarput, kingornalu illuatungeriinnit akuerineqarumaarlutik. Akuersisoqareerpat akissarsiat kingumoortumik 1. april 2022-miit nalimmassarneqassapput.
Paasisaqarnerorusukkuit SIK-mi siulittaasoq Jess G. Berthelsen saaffigiuk, oqa. +299 55 88 15 imaluunniit Sulisunut Isumaqatiginninniarnermullu Pisortaq Frederik Schmidt saaffigiuk, oqa. +299 34 66 81.