Takkuttussaagamimi maanna takkuppoq. Tassa 1990-imi septembarimilli ataannartumik SIK-p siulittaasorisaa Jess G. Berthelsen pillugu atuakkiaq. Atuakkap taaguutigaa ”JessGustav” – malugalugu Jess aamma Gustav ataannartumik allallugit. Tamatuma nassuiaatissartaa atuakkap kapitaliani siullermi atuarneqarsinnaavoq.
Atuakkami Jess G. Berthelsenip tunuliaquttani kiisalu inuunermini sulinerminilu pingaartitani oqaluttuarai, minnerunngitsumillu aamma sulisartoqarnerup iluani ukiorpassuanngortuni naapittakkani anguniarsimasanilu isertuaatsumik saqqummiussuullugit. Taamaalilluni atuagaq inuup inuuneranik allaaserinniffiuvoq nalliuttorsiutaajutigaluni, aammalu ukiuni pineqartuni inuiaqatigiit oqaluttuassartaasa ilaannik takussutissiilluni.
”JessGustav”-ip atuakkatut qiterisaa tassaavoq inuup pineqartup nammineq oqaluttuarnera isummersorneralu. Oqaluttuamik katiterisuuvoq Nukaraq Eugenius, taamaaliorporlu nammineq pineqartumik oqaloqatiginninnini, aammalu SIK-mi sulisut marluk taassuminnga oqaloqatiginninnerat, tunngavigalugit. Aammali immikkoortoqarpoq qulequtaqartumik ”Unammillertitoqaq”, tassanilu SIK-p Sisimiuni immikkoortortaani ukiorpassuanngortuni siuttuusoq Jens Johansen nammineq ilisarititsissuteqarpoq.
”Jess G. Berthelsenip sulisartut peqatigiiffeqarnerat katuffeqarnerallu ukiuni suleqataaffimmini aaqqissuussivigaa sulisartoqarneq tamaat eqqarsaatigalugu toqqissisimanermik atugarissaarnerulernermillu kinguneqartumik,” atuakkiortoq atuakkap imarisaanik saqqummiussinermini taama allappoq, imalu inerniliilluni: ”Sulisartut kattuffiat SIK iluarsaateqqippaa inuiaqatigiinni kalaallini avaqqunneqarsinnaanngitsumik inissisimalersillugu”.
SIK-p allattoqarfiani pisortaasoq Bjarne Petersen atuakkap siulequtaanik allattuuvoq, aallaqqaasiisuuvorlu Jakob Janussen, Namminersornerullutik Oqartussani sulisoqarnermut pisortaanermini SIK-mik isumaqatiginninniartoqarnerani siulersortaasarsimasoq. Atuakkap immikkoortui naggasiutaasut marluk, SIK-p politikkikkut suleqatigiiffinnut attaveqarneranik SIK-llu oqaluttuarisaanerani taaasassanik pingaarnerusunik oqaluttuarinniffiusut Svend Møllerip allagarai.
Estrella Mølgaard Thomsen ukiuni kingullerni 18-ini Jess G. Berthelsenip allattaatut tassumunnga qaninnerpaamik suleqataasimagami ilisimasarpassuaqartoq atuakkap imarisaanik pilersaarusiornermi suleqataavoq. Atuakkap assiliartai ilaatigut Leiff Josefsenip aamma Lisbet Lyagerip, tamarmik Sermitsiami assiliisuusut, assilisaraat ilaallu tassaallutik GAS/SIK-p toqqorsivianeersut kikkut assiliisuunerannik nalunartut.
Atuagaq qeratasuumik ungalulik immikkut kalaallisut immikkullu qallunaatut naqitigaavoq (80-inik qupperneqarluni). 2021-p ukiaanerani pisiniarfinni nioqqutaalissaaq.
Ilusilersuisoq: Nina Spore Kreutzmann, tita.gl. Naqiterisitsisoq: SIK, septembari 2021
► Una tooruk siulittaasup tulliata Ludvig Larsenip atuakkamik saqqummiussinermi oqaasii atuarumallugit
Atuagaq SIK-p Ilulissani ataatsimeersuanngitsiarnerani saqqummersinneqarpoq. Aajunalu atuakkami pineqartoq atsiortinneqaqattaarpoq atuakkamik pissarsisunit siullerpaanit, tassa ataatsimeersuarianit.