SIK-mi ataqqinaammik Ilaasortarput Jonas Fleischer sapaammi 27. aggusti 2023 ullaakkut toqukkut qimaguppoq.
Jonarsi nunatsinni sulisartoqarnerup iluani annertoorujussuarmik sunniuteqarsimavoq.
Siullermik taasariaqarpoq Marmorilimmi sulisartut nunaqavissut tikisitallu assigiimmik aningaasarsiaqalernissaannut annertuumik sorsoqataareerluni anguaa sulisut taakkua assigiimmik aningaasarsiaqalernissaat.
Jonarsi aamma ukiorpaaluit Aasianni sulisartut peqatigiiffianni siulersuisunut ilaasortaavoq. Aasiannillu aallartitaalluni 1987-mi Jens Johansenilu marluullutik siulittaasuupput ukioq ataaseq.
Jonarsi taannaavoq SIK-mi siulersuisuunernut atasuinnarmik sivisunerpaamik ilaasortaasoq, 1987-miit 2013 tikillugu siulersuisuunernut ilaasortaagami.
Jonarsittaaq taannaavoq aamma soraarnerussutisiaqalernissamik aningaasaateqarfitsinnik SISA-mik aallartitseqataasoq.
Tassa 1993-imi isumaqatigiinniarnitsinni soraarnerussutisiaqalernissamut aningaasaateqarfeqalernissaq isumaqatigiissutitigut aaqqiivigaarput, 1994-imi januaarimit aningaasaateqarfimmut ikioraasoqalissammat. 1999-imilu soraarnerussutisiaqalernissamut aningaasaateqarfipput Finanstilsynimit akuerisaammat siulersuisunngortuni siullerni Jonarsi ilaavoq.
Jonarsip siulersuisuunerni suleqataanermini pingaartitaasa ilaagaat oqaatsitta aamma isumaqatigiissutitigut pingaarnertut atuutsinneqarnissaat. Taamaattumik 1993-imi isumaqatigiinniarnitsinni oqaatsitta pingaarnertut isumaqatigiissutini aammalu isumaqatigiinniartarnerni kalaallisut oqaatsitta pingaarnertut atorneqarnissaannik taamanikkut Naalakkersuisullu isumaqatigiissuteqarnitsinnut Jonarsi annertuumik peqataavoq.
Jonarsi anguniakkamik qasusuilluni sulissutiginnittarpoq. Imaasiinnarlunilu naakkaannarusunneq ajortuuvoq, taamatullu sulisartut aningaasarsiatigut pitsaanerpaamik inissinneqarnissaannut annertuumik taannaavoq qimuttartoq, aammalumi annertuumik uannut qimutsitsisartoq. Tassa anguniagaqartilluni uteriitsuunera aammalu nakkaanarumanngittarnera sorpassuartigut SIK-mi iluaqutissarsiffigisarparput.
Jonarsittaaq aningaasaateqarfitsinni allani ukiorpassuarni siulersuisunut ilaasortaavoq, tassalu Qaammarsaanermut Ilinniartitaanermullu Aningaasaateqarfimmi aammalu Feriefondimi.
Sulisartut Højskoliata siulersuisuini Jonarsi ukiorpassuarni ilaasortaavoq, tassanittaaq aamma annertuumik ulluinnarni Højskolitta pitsaasumik ingerlanneqarnissaanut suleqataalluni.
Jonarsip ilisarnaataasa ilagaat kisitsisinut pikkorissuunini. Taamaammat siulersuisuunernit toqqagaalluni isumaqatigiinniarnerni annertuumik peqataajuartarmammi iluaqutigisaqaarput.
iIisarnaataasa ilagaattaaq sumiluunniit ataatsimiittussaatilluni piareersaqqissaartarsimanera malunnartuaannarmat. Ataatsimiissutissat atuaqqissaartarpai, taamaasillunilu takutittarlugu sumiluunniit qinigaaffimmini qinernersisini ataqqillugit sullitanilu pingaartillugit. Tupigusuutigisartakkama ilagaat SISA-mi aningaasarsiornermut inatsiserpassuarnuilu tunngasutigut malitassat iluanni inorsarani qanoq peqataalluartigisarnera, aammalu kisigani paasisaqarusulluni apersortuartarnerata takutittarppaa suliaminut qanoq tunniusimatiginera.
Matumuuna SIK-miit ilaqutaanut, meeraanut qatanngutaanullu minnerunngitsumillu nulianut ukiorpassuarni sulisartoqarnerup iluani uiminut sulinissaanut tapersersueqataalluarsimasumut misiginneqataanerput nalunaarutigerusupparput.
Jonarsip eqqaaneqarnera ataqqinartuuli
Jess G. Berthelsen,
SIK-p siulittaasua
Jonas Fleischer nulianilu Hansigne, 2021-mi assilisat. (Assiliisoq: Inge Lennert)