Københavnimi Kalaallit Peqqissartut Illuanni ningiuusoq Birtha Bianco ualeq manna SIK-p siulersuisuunerinik pulaartoqarpoq. Siulersuisuunerit siulittaasoq Jess G. Berthelsen siulersortigalugu pulaartut kaffillerfigineqarput kaagisugassinneqarlutillu. Siulittaasorlu nalunaarpoq 5.000 kr.-it SIK-p Isumaginninnermut Aningaasaateqarfiinit peqqissartut illuata kontuanut nuunneqassasut.
Aningaasat taakku tapiissutaassapput inersimasut meeqqallu nalliuttorsuarmi peqqissartut illuanniikkumaartut pisiniunneqalaarnissaannut.
Birtha Bianco SIK-p tunissutaanut qujamasunnerarpoq. Oqarporlu juullip nalaani peqqissartut illuanniittut 30-t missaanniikkajuttut. Qujamasupporlu SIK-p taakku eqqarsaatigimmagit.
“Tunissutisi pingaaruteqarput. Peqqissartut nuannersumik misigisaqartinnissaannut atorneqarumaarput,” Birtha Bianco oqarpoq.
SIK-p siulersuisuunerisa ukioq manna ataatsimiinnertik kingulleq Københavnimi ingerlappaat.
Siulersuisuunerit ataatsimiinnerannut atatillugu isumasioqatigiittoqarajuttarpoq sammisassat aalajangersimasut itisileriffigalugit.
Tamatumuuna sulisut sinniisoqarnerata qanoq nukittorsarneqarsinnaanera ilaatigut sammineqarpoq. Taamaattumillu sulisartut kattuffiata 3F-ip Københavnimi qullersaqarfia pulaarneqarpoq sulisut sinniisaasa pikkorissarneqartarnerannut tunngasutigut isumassarsiorfigiartorlugu. Aammalu Danmarkimi sulisartut kattuffissuata LO-p Helsingørimi højskolerisimasaani, ullumi Konventum-imik taaguuteqartumi, ingerlatsisut ataatsimeeqatigineqassapput.
Kalaallit Peqqissartut Illuanni ningiup Birtha Biancop SIK-p Isumaginninnermut Aningaasaateqarfianit tunissut SIK-p siulittaasuanit Jess G. Berthelsenimit tiguaa. Tunuanni ersipput SIK-p siulersuisuisuunerinut ilaasortat ilaat. Saamerlermit: Pele Knud Mathiessen, Else Jonna Villadsen, Peter B. Mølgaard, Sofie Svendsen aamma Qulutannguaq Berthelsen.