Oqaaseqaat: Nuummi mittarfiup tallilerneqarnerata suliarinera qiteqquppoq. Mittarfittaassap affaa tassa 3. novembari 2022 atoqqaarfissiorneqarpoq, ulluinnarnilu atorneqalerluni. Mittarfittaassap tamarmi naammassinissaanut, taamalu aamma tamakkerlugu atulernissaanut ukiut marluujunnaarput.
Kangerlussuarmi ilaqutariit sulisartukkormiut ukiorpassuit ilaqutariittut pilersitartik angerlarsimaffik, meeqqamik qaatuussaat, minnerunngitsumillu suliffitik piginnaassanerlugit naluaat, taamaattumillu tupinnanngitsumik siunissamut ernumapput, aammalu paasinakutsoorput. Tassami pisussat inuunerminnik allanngortitsilluinnarsinnaasut qanilliartuinnarput.
Nuummi Ilulissanilu mittarfiliornerit naammassinissaat aanaralaarsuanngorpoq, oqaluttuunneqassanatillu nunaqarfitsik pillugu qanoq pisoqarnissaanik. Annermilli inuit namminneq qanoq pilersaarusiorfigineqarnerlutik assut tusarusuppaat. Sulisoriinnarneqassagunik, taava sumi sulilernissaat eqqarsaatigineqarpa? Nuutsinniarneqarunik sumi sulissappat? Illussaqartinneqarpaat? Meerartaat atuarfissaqarpat, meeqqerivissaqarpat? Aapparisaat aamma taamatut eqqarsarput, uagummi aamma suliffissaqartinneqassanerluta?
Ilaa – Taamani mittarfiliornissaq pilersaarusiorneqalermalli, massakkut ukiuni tallimanngulersuni Kangerlussuarmiut ilaqutariittut inuuneranni allanngortoqartussaasoq tamatta nalunngilarput. Taamaattorli suli ersarissumik tusanngilarput Kangerlussuarmi ilaqutariit sulisartukkormiut qanoq pineqarniarnersut. Tamakku mittarfittaarnissarli pilersaarutigineqalermat politikerinut apeqqutigisaraluarlugit ulloq manna tikillugu suli ersarissumik akissutisinngilagut. Taamaattumik mittarfinnut attuumassuteqartusi tamassi kajumissaarpassi piaartumik ersarissumik pilersaarutissinnik Kangerlussuarmiut saqqummiivigissagisi.
Jess G. Berthelsen,
SIK-p siulittaasua