Kommunini sulisoqarnikkut iliuuseqartarnerit pitsaanerulersimappat? Tamanna apeqqutigiuminarpoq maanna ukiut marlungajaat qaangiunneranni, taamani SIK sulisullu kattuffii allat pingasut ataatsimoorlutik nunatsinni kommuninut tallimanut saaffiginnissuteqarmata sulisoqarnikkut suliassanik ingerlatsinerminnik nukittorsaanissaat kajumissaarutigalugu.
Tamatumani pineqartut ilaatigut tassaapput soraarsitsisarnerit tunngavilersugaanngitsut imaluunniit tunngavilersorluagaanngitsut. Allatut oqaatigalugu ”toorlattumik” soraarsitsisarnerit. Aamma soraarsitsilersinnani tusarniaaqqaartarnissamik inatsisitigut piumasaq malinneqartuaannanngilaq – tusarniaanngitsuuittoqarsinnaasarpoq imaluunniit tusarniaanerit amigartumik ingerlanneqartarlutik. Taamatuttaaq sulisunut ataasiakkaanut iliuuseqartarnerit sakkortussutsimikkut qanoq ittuuneri maluginiarnartoqarput – ilaatigut sakkortuallaartaramik, suliassap qanoq ittuunera eqqarsaatigalugu ingasaginartarlutik.
Kommunit suliassanik taamaattunik suliarinnittarnerata pitsaanerulersimaneranik apeqqut ”akiuminaassinnaasoq” SIK-p allattoqarfiani pisortap inatsisilerituullu Bjarne Petersenip kommuninut tamanut allakkamini oqaatigaa. Aammami tamatumani apeqqutaagami kommune sorleq pineqarnersoq.
Allattoqarfimmi pisortap allagaa 2020-mi SIK-p, IMAK-ip, AK-p aamma PPK-p marloriarlutik kommuninut kajumissaarutigisaannik malittarinneqqinneruvoq.
Bjarne Petersenilli naliliinera naapertorlugu kommunit ”suli iluarsiniagassaqarput sulisoqarnermut tunngatillugu suliaqartarnerminni”.
Taamaattumillu SIK-p allattoqarfiani pisortap 2023-mi aasaleqqaarnerani kommunit tamaasa immikkut allaffigai kajumissaarilluni sulisoqarnikkut iliuuseqarfigisartakkat pingasutigut pitsanngorsaavigineqaqqullugit.
Tusarniaasarnerit
SIK-p paasisimavaa suliffeqarfinni ataasiakkaani il.il. pisortaasut soraarsissamaalikkaminnik tusarniaanngitsoorajuttut. Pisunilu taamaattuni erseqqissumik oqaatigineqarsinnaaneq ajorpoq suliffeqarfimmi pisortaasup aalajangiinnginnerani kommunip sulisoqarnermut immikkoortortaa qanoq akuutinneqarsimatiginersoq.
Tusarniaaqqaartoqaraluartorlu tusarniaaneq amigartumik ingerlanneqarsinnaasarpoq. Soorlu allagaq tusarniaassut imarisamigut oqaasertamigullu paasiuminaakulussinnaasarpoq – kalaallisuujuguni qallunaatuujuguniluunniit. Aamma sooq soraarsitsiniartoqarnera allakkami tusarniaassummi naammattumik nassuiarneqanngitsoorsinnaasarpoq.
Kommuninut kajumissaarutigineqarpoq sulisoqarnermut immikkoortortaqarfiup soraasitsissamaalernermi tamatigut tusarniaasoqaqqaartarnissaa qulakkiissagaat tusarniaanerillu imarisamikkut eqqortuunissaat paasiuminarluartuunissaallu sulissutigalugu.
Tunngavilersuilluartannginneq
Ilaannikkut tunngavilersugaanngitsumik soraarsitsisoqartarpoq. Imaluunniit amigartumik tunngavilersuisoqartarpoq, tassa soraarsitsinermut pissutaasoq erseqqissarneqarluarani.
Soraarsitsinerit aalajangiinernut pisortani suliassat suliarineqartarnerat pillugu inatsimmi pineqartunut ilaapput, taamaattumillu soraarsitsinerup sumik pissuteqarnera allakkatigut sukumiisumik nassuiagassaavoq.
Tassani SIK-mit kommuninut kajumissaarutigineqarpoq sulisoqarnermut immikkoortortaqarfiup soraarsitaasoqartillugu tamatuma sumik pissuteqarnerata sukumiisumik nassuiarneqartarnissaa qulakkeerniarneqassasoq.
Sukangavallaartumik iliuuseqarfiginnittarnerit
Tunngavissap ”atsikkutigiissaarinermik” taaneqartartup isumaa tassaavoq sulisup kukkuluttuutigisimasaanut naleqquttumik kinguneqartitsiniartarnissaq – tassa iliuuseqarfinninneq sukangavallaaraniluunniit qasungavallaassanngitsoq.
Atsikkutigiissaarinissaq tunngavigalugu iliuuseqarnissaq kommunini ”puigorneqartaannarpoq” – taamalu sakkortuallaamik iliortoqartarluni. Imaassinnaavoq sulisoq peersinneqartoq, suliarineqartup pissusia immini peersitsissutaasussaanngikkaluartoq.
Taamattaaq mianersoqqussuteqaqqaarani soraarsitsisoqartarpoq. Tassanilu SIK-p erseqqissarusuppaa mianersoqqusineq tamatigut allakkatigoortuusariaqartoq, uppernarsaatissaqarnissaq ilaatigut pillugu.
SIK-p kajumissaarutigiumavaa soraarsitsinissanik suliaqartarnerni atsikkutigiissaarinissap nalilersuinermut ilaatinneqartarnissaa, taamaalilluni sulisup kukkuluttorneranut naapertuuttumik aalajangiisoqartarnissaa qulakkeerneqarniassammat.
Tamatta akisussaaffeqarpugut
SIK-mit allakkami naggasiullugu erseqqissarneqarpoq soorunami aamma sulisut akisussaaqataammata kommunip suliffeqarfiutaani sulinermi atugassarisat pitsaasuullutillu torersuunissaannut. Taamaattumillu qanoq peqatigiilluta suliffinni pitsaasunik tunngavissaqartitsinissarput pillugu oqaloqatigiinnernut SIK peqataarusulluinnarpoq.
Kommuninut allakkat kopiiannik Namminersorlutik Oqartussani Aningaasarnermut Sulisoqarnermullu Aqutsisoqarfik nassinneqarpoq.