Skip to content

Kommunip avittussanngornerani iliuutsit paatsiveerunnartut

Ilaasortarpassuavut suliffeerunniannginnamik pinngitsaalineqartutut mi­si­gisi­mal­lutik Kommune Qeqertalimmut nuunnissaminnut akuersipput. Maannalu uuka­paatinne­qar­si­ma­­sutut misigisimapput.

Qaasuitsup Kommuniata marlunnut avittussanngorneranut atatillugu sulisut ilaat Qaasuitsup Kommunianit oktobarimi neqeroorfigineqarput Aasiannut nuussinnaasut tassani Kommune Qeqertalim­mi suliffeqalissallutik, taamalu atorfitik tassani tigummiinnarsinnaassallugit. Ilisimatinneqarpullu neqeroorummut naaggaarunik atorfimminnit soraarsinneqarsinnaasut.

SIK-mut ilaasortaasut arlallit suliffeqaannarusukkamik neqeroorut ilassivaat, taamalu Aasiannut nuun­nissaminnut akuersillutik – naak Ilulissaniiginnarusukkaluarlutik.

Maannalu SIK-p tusagassiuutitigut paasereersimalerpaa sulisut Kommune Qeqertalimmut nuunnissaminnut naaggaarsimasut neqeroorfigineqarsimasut Avannaata Kommuniani nu­taami atorfe­qalernissaminnik, taamalu Ilulissani najugaqarlutik atorfeqaannarnissamin­nik. Soorunami taakku qutsappavut.

Aajunali nuanniitsua: Ilaasortarpassuavut suliffeerunniannginnamik pinngitsaalineqartutut mi­si­gisi­mal­lutik Kommune Qeqertalimmut nuunnissaminnut akuersipput. Maannalu uuka­paatinne­qar­si­ma­­sutut misigisimapput, ima eqqarsalerlutik: Akuersisimassanngikka­lu­arama, taava Ilulissanii­gin­narsimassagaluarpunga. – Tupinnanngitsumik maannakkut illaa­tigineqartutut misigisimapput.

SIK-mut ilaasortat Qaasuitsup Kommuniata avinneqarneranit kalluarneqartussat sinnerlugit SIK iliuuseqarsimavoq, ilaatigut oktobarimi tusarniaanernut akissuteqarsimalluni – Qaasuitsup Kom­muniata sulisut Kommune Qeqertalimmut nuunnissaannik neqeroorutaanut tunngatillugu oqaa­seqarfigisariaqartut pingaaruteqartut arlallit oqaaseqarfigalugit.

Taamaattumik SIK-p pissusissamisoortuutippaa piaartumik paasissallugu oqaaseqarfigisimasavut Qaasuitsup Kommuniata qanoq isummerfiginerai, taamaalilluta ilaasortatta soqutigisaat sulissuti­gisinnaaniassagatsigit. Ajoraluartumilli ullumi novembarip 13-iani kommunimit suli akissutisinngilagut.

Qaasuitsup Kommuniata kommunip avinnissaanik suliarinninnera paatsiveerunnarpoq, pilersaarusiorluarnerusimanissarlu kissaatiginaraluarpoq. Soorlu SIK-mi isumaqarpugut kikkut kommuninut nutaanut marlunnut inissinneqarnissaat qangali aalajangerneqarsimasariaqaraluartoq, maanna aat­saat piffissaq kingullerpaaq atorlugu taamaaliornani. Taama sivisutigisumik utaqqisinneqarneq su­lisunut erloqinartuuvoq.

Soorlu kommunip sulisut pineqartut paasissutissilluarnerusimasariaqaraluarpai kommunimut nutaamut nuunnissamik neqeroorut akuerigaanni naaggaaraanniluunniit tamanna qanoq kingune­qas­­­sanersoq. Taamaappoq aamma siunissami ineqarnissamut tunngatillugu paasissutissilluarne­qarnerunissaq eqqarsaatigalugu.

Jess G. Berthelsen
Kattuffiup siulittaasua