Skip to content

Nammaqatigiinneq, naligiinneq peqatigiilluarnerlu

LAB tassaavoq Spaniap avannaani Baskerit nunaanni sulisartut kattuffiat, SIK-p nunani tamalaani attavigisartagaasa ilaat. LAB ulluni 14.-17. juuni 2022 ataatsimeersuarpoq, qaaqqusallu nunanit assigiinngitsuneersut oqaaseqartinneqarneranni SIK-p siulittaasua Jess G. Berthelsen ilaavoq. Oqaaseqaataa imaappoq:

Ataatsimeersuartut ataqqinartusi!

Kalaallit Nunaanni sulisartut kattuffiat SIK sinnerlugu maani sassarfigisinnaagassi tamanna ataqqinaatitut angisuutut isigaara, tassami arlalitsigut isumaqatigiikkatta anguniagarlu ataa­siusoq siunniusimagatsigu – tassa Namminiilivinnissaq – imaappoq nunap inunngorfigisatta najugarisattalu tamatigut oqartussaaffigilivinnissaa.

Nunatsinni Kalaallit Nunaanni anguniakkap tamatuma tungaalitsiternera sivisusinnaallu­nilu akornutissarpassuaqarsinnaasoq sulissutigiuarparput. Siunissami ullut ilaanni namminiilivilluta inuiattullu tamakkiisumik akuerineqarluta oqarsinnaalertariaqaratta. Tamanna uanga inuutillunga piumaarnersoq ullumi oqaatigisinnaanngilara. Oqaatigisinnaavarali siunertaq qanillattulersimagipput – naak namminiilivinnissamut aqqut sivisunaarnartutut misinnarsinnaasaraluartoq.

Pissutsit nunasiaanermi atuuttut meeraaninnit eqqaamalluaqaakka. Taavali inuusuttuutillunga Namminersornerulerpugut, nammineq inatsisartoqalerluta, inersimasunngorninnilu kingusinnerusukkut Namminersulerpugut amerlanerusunik oqartussaaffeqalerluta – soorlu nunamik piginnittussaatitaaneq angullutigu, tassa pisuussutivut uumassusillit minnerunngitsumillu aamma nunatsinni aatsitassarpassuit nunamiittut oqartussaaffigilerlutigit.

Aatsitassat taavakka, taakkumi atorluarnerisigut Namminiilivinnissamut alloriarnerit aalajangiisuulluinnartut kingulliit angusinnaassagatsigit. Kalaallit Nunaannimi inuppassuu­vu­gut qularutiginninngitsut aatsitassaativut naalakkersuinikkullu iliuuseqarnerit allat atorlugit atugarissaarnerulernissaq angusinnaagipput, taamaalillutalu aamma inuiaqatigiinni kinguaariit tulliuttut pissaannik illikartitsivigisinnaassagivut.

Kiffaanngissuseq namminiilivinnissarlu eqqartortillugit kulturi taanngitsoorsinnaanngilarput. Taannaavormi nunarsuarmioqatigiinni akuuffigisatsinni assigiinngitsorpassuusuni kinaassutsitsinnik suminngaanneersuunitsinnillu takussutissiisoq – aamma uagutsinnut Inunnut Kalaallit Nunaannit pisunut ilisarnaataasumik.

Kulturikkummi ersersinneqartarput naleqartitat ukiorpassuit ingerlaneranni ulluni ajunngit­suni ajortunilu attassimasavut immikkut ilisarnaatigalugit kinaassutsitsinnilu ersersitsi­soralugit, taakkualu atorlugit silarsuarmioqatitsinnut ajunngitsunik tunniussassaqarpugut, inuiaat allat kulturii ataqqilluinnarlugit.

Aap, kulturikkut tamatta immikkut naleqartitavut silarsuarmi tamarmi sulisartut kattuffiisa pingaartitaannik nammaqatigiinnissamik, naligiinnissamik peqatigiilluarnissamillu akoorluarutsigit inuiaat assigiinngitsut kiffaanngissutsimik namminiilivinnissamillu suliniutaannut kimittuumik tunniussassaqassagut!