Feriefondi angalanissanik makitsisimagaangat nuannaartoqarlunilu pakatsisoqartarpoq. Facebookikkullu qisuariaatit imaaginnalertarput. Nassuiaat una SIK-p allattoqarfianit kattuffiup Facebookianut ilanngunneqartoq arlalinnit iluarisimaarneqarpoq:
Makitaasimasut pingaartumik angalareersimallutik ilaqutannguatillu nuannisarsimanerminnik unnersiorlutik saaffiginnikkaangata SIK-mi nuannaaqatigisarpavut – taamatulli aamma ukiorpassuanngortuni qinnuteqartarsimagaluarlutik makitaanngitsoortuartut pakatsillutik saaffiginnikkaangata amerlanertigut paasisinnaalluartarpavut.
”Makitaasaraanniluunniit!”, taamatut assingusumillu anersaarulunneq pingaartumik Facebookikkut tusarngartarinngilarput.
Ilaannikkulli erseqqissaasariaqalertarpugut naqqiisariaqalertarlutalu – tamatumunnga periarfissinneqaraangatta. Tassami eqqunngitsumik oqaluttoqartaannarpoq pisuutitsisoqartarlunilu.
Soorlu ima oqartoqarsinnaasarpoq: ”Aasiit nalunngisaminnik makitsisimaqaat!”
Akissut: Taamaaliortoqanngisaannarpoq. Makitsineq makitsinerugami soorunami taamungaannaq (nalaatsornerinnakkut) pisarpoq. Eqqortumillu pisoqarnersoq nakkutigineqarniassammat eqqartuussisumik najuuttoqartarpoq.
Aamma ima oqartoqartaannarpoq: ”Makitaaneq ajorama SIK-mut ilaasortaajunnaaginnassaqaanga!”
Akissut: Tamanna ilaasortaanermut tunngassuteqanngilaq. SIK-p isumaqatigiissutai tunngavigalugit sulisuugaanni, imaanngitsoq aatsaat SIK-mut ilaasortaagaanni, suliffillu Feriefondimut akiliisartuuppat, qinnuteqartoqarsinnaavoq.
Soorunami SIK-mut iluassagaluarpoq ilaasortaasut kisimik qinnuteqarsinnaatitaagaluarpata – tassami SIK-p ilungersuuteqarneratigut aningaasaateqarfik taanna pilersinneqarsimammat. Kisianni tassa sulisitsisut qangali piumasarimmassuk ilaasortaanngitsuttaaq qinnuteqarnissaminnut mattunneqassanngitsut, ullumikkut pissutsit taamaapput.
Kingullertigut aamma ima naammagittaalliortoqartarpoq: ”Makitaasimagaluarama atunngitsuutinneqarpoq” imaluunniit ”Qinnuteqaraluarama itigartitaavunga.”
Akissut: Aap, SIK-p isumaqatigiissutai tunngavigalugit sulisuunngikkaanni aamma/imaluunniit suliffik (sulisitsisoq) Feriefondimut akiliioraanngippat, aningaasaaateqarfimmit taassumannga angalanissamut akiliunneqartoqarsinnaanngilaq. Taamaattumik akissarsiat allagartaat tamatumani uppernarsaatitut piumasarisarpavut.
► Feriefondip malittarisassai tamakkiisumik paasisaqarfiginiaraanni sulisitsisullu kikkut akiliioraanersut takorusukkaanni una toorlugu paasisassarsiortoqarsinnaavoq: https://sik.gl/…/sulinngiffeqarluni-angalanermut…/
► 2023-mi ilaqutariit 509-t akiliunneqarlutik angalasussanngorput. Sms-ikkut ilisimatitsissutit pillugit allaaserisaq paasisaqarusukkuit uani atuaruk: https://sik.gl/2023-mi-feeriartussat/