SIK-p Sulinngiffeqarluni Angalanermut Aningaasaateqarfiata (Feriefondip) angalanissanut makitsinikkut agguaanneqartussanut qinnuteqartitsinera maajip aallaqqaataani aallartittaraluarpoq, tassa sulisartut ulluanni. Aggustillu aallaqqaataata tungaanut qinnuteqartoqarsinnaasaraluarpoq. Ukioq mannali taamaassanngilaq.
Makitsinikkut angalanissanut qinnuteqarnerit ukioq manna pisinnaapput 15. juunimit 1. septembarip tungaanut.
Aamma maluginiarneqassaaq SIK-p isumaqatigiissutai malillugit sulisuusut ilaannaat makitsinikkut angalanissanut qinnuteqarsinnaalissammata – tassa sulisut ilaat aalajangersimasut aappaagumit ukioq allortarlugu sulinngiffeqarlutik angalanissaminnut akiliunneqarsinnaalissammata.
Makitsinikkut angalanerit – nittartakkakkuinnaq qinnutigineqassapput
Makitsinikkut angalanernut piumaneqarluartartunut qinnuteqarsinnaanermut piffissap allanngortinneqarneranut pissutaasut arlariiupput.
Siullermik qinnuteqarneq ukioq mannamit taamaallaat SIK-p nittartagaatigut toqqaannartumik immersuinikkut pisinnaanngussaaq. Taamatut nittartakkakkut qinnuteqarsinnaaneq 2021-mi aallartimmalli tamatuma saniatigut pisarnertut pappiaqqamut immersuilluni qinnuteqarsinnaaneq aamma periarfissaajuarsimavoq. Maannalu nittartakkakkut qinnuteqarneq sungiunneqalermat, aammalumi allaffissornikkut pisariinneroqimmat, Feriefondip siulersuisui aalajangersimapput pappiaqqamut immersuilluni qinnuteqartitsisarneq atorunnaassasoq.
Tamatuma piareersarnissaanut piffissaqarnerusariaqarpoq, aammami nittartakkami immersugassaq iluarsaallugulu naleqqussagassaammat – inuillu ilisimatinneqartussaammata.
Qinnuteqarnissamut piffissamik allannguinermut pissutaaqataavortaaq SIK-p Feriefondiata allannguuteqalernera, tassa aningaasaateqarfik 2024-mit angalanernut allanut aamma atorneqalersussaagami.
Ukioq allortarlugu angalanissamut akiliunneqarsinnaalerneq – 2024-mit
Pisortani sulisitsisut (Namminersorlutik Oqartussat, kommunit Danmarkillu naalagaaffiata) SIK-llu isumaqatigiissutaat nutaat naapertorlugit sulisut ilaat isumaqatigiissutitigoortumik ukioq allortarlugu sulinngiffeqarlutik angalanissaminnut akiliunneqarsinnaalerput. Sulisut tamatumani pineqartut makkuupput:
1) Niuernermi allaffinnilu sulisut (HK-t)
2) Meeqqerisut isumaginninnermilu ikiortit socialmedhjælperit socialhjælperillu
3) Peqqinnissamut ikiortit
4) Oqalutsit nutserisullu
Sulisut taakkua akiliunneqarlutik angalasarnissaasa ingerlanneqarnerannut najoqqutassiat maanna suliarineqarput. Nalunanngilarli taamatut akiliunneqarnerit siulliit atuutilissasut ulloq 1. apriili 2024-mit (tassa angalassutissat ukiuni marlunni katersorneqartussaammata isumaqatigiissutit kingumoortumik atuutilerfiat 1. apriili 2022 aallarnerfigalugu). Angalanissanut allatsinnermi bilitsinillu inniminniinermi piffissalersuutissat periaasissallu susassaqartunut tamanut SIK-mit ilisimatitsissutigineqarumaarput ukioq manna aasap naalernerani.
Unali maanna erseqqippoq: Aappaagumit ukioq allortarlugu angalanernut akiliunneqarsinnaalersussat (tassa sulisut ilaat qulaani taaneqartut) makitsinikkut angalanissanut ukioq mannamit qinnuteqarsinnaajunnaarput.
Qinnuteqarnermut ilitsersuutit
Makitsinikkut angalanissanut 2024-mi pisussanut qinnuteqarnermut ilitsersuutit nittartakkami matumaniittut iluarsineqassapput kingusinnerpaamik juunip aallartinnerani.
Ilitsersuutinut atuarneqarsinnaasussanut tapertaliullugu videokkut ilitsersuut takusassiaralugu quppernermut inissinneqarumaarpoq. Kiisalu qinnuteqarnermi eqqaamasassat pingaarnerit TV-kkut ussassaarutitigut nalunaarutigineqartarumaarput.
Qinnuteqarniartut nalornisoortut aamma SIK-mut sianerlutik ilitsersuunneqarsinnaasarumaarput.