Facebookimi live-rluni naammanngitsumik eqqoqqissaanngitsumillu oqaluttuartoqarneratigut SIK-p Isumaginninnermut Aningaasaateqarfia sullissinerlussorineqalerpoq – aammami peqatigiiffik meeqqanik ikiuiniaqatigiiffik aammalu ilaqutariinnut naalakkersuisoq tamatumunnga qisuariarmata inerniliillutillu pissutsinut piviusunut naapertuutinngitsumik.
Facebookikkut pineqartoq tassaavoq aapparisamik perululluni napparsimasumik Danmarkimi napparsimavimmi uninngajartortumik meeqqisarluni ingiaqatiginninnissamut tapiiffigineqartoq, isumaginninnermut aningaasaateqarfiup periarfissarititai tusaamasaalluartut atorlugit.
Oqaluttuarineqarpoq ilaqutariit erloqinartumik inissisimalersimasut. Aningaasaateqarfimmit tapiiffigineqartoq Københavnimi Kalaallit Peqqissartut Illuanniinnermut ullunut arlalinnut nammineq akiliisariaqalersimavoq, tamatumalu kingorna qanoq iliuusissaarussimapput Danmarkimiinnerminni inissarsinissaminnut tunngatillugu.
Pisut oqaluttuarineqartut soorunami nuanninngillat. Tamannalumi Facebookimi malinnaasorpassuarnit mamiatsaatigineqarpoq.
Meeqqanik ilaqutariinnillu ikiuiniaqatigiiffik MAPI paasissutissat saqqummiunneqartut innersuussutigalugit aningaasanik katersuinialerpoq – tamannalu nersugassaavoq pingaartumik pisimasut qanorpiaq ittuunersut ilisimanngikkaanni.
Ilaqutariit atugarisaannut naalakkersuisoq Mimi Karlsen Facebookimi allappoq oqaatigalugu ilaqutariit SIK aqqutigalugu Danmarkimiittut – imalu nangilluni: “SIK aammalu peqqissartut illuanni ningiu piumaffigineqarput [tapiiffigineqartoq] ilaqutaalu oqaloqatigissagaat. Paasitinneqarpunga ilaqutariit SIK-mit inissarsitinneqaqqittut, peqqissartut inaanni inissaqanngimmata.”
Pissutsit piviusut imaapput:
Soorlumi suliassani tamatumunnga assingusuni allarpassuarni taama pisoqartartoq, SIK-p isumaginninnermut aningaasaateqarfiani sulisoq tapiiffigineqartumut ilisimatitsisimavoq peqqissartut illuanniinnerup taaneqartup kingornatigut allamik inissarsissunneqarumaartoq. Tamannami isumaginninnermut aningaasaateqarfiup ikiorsiissutaanut qinnutigineqartunut ilaareerpoq. Taamaattumillu ilaqutariit ilungersunartorsiornerminni SIK-mit sumiginnarneqartutut oqaluttuarineqarnerat ilumuunngilaq.
Taamaattumillu aamma Mimi Karlsenip SIK-mut Københavnimilu kalaallit peqqissartut illuannut saaffiginnittoqarnerata kingorna aatsaat inissarsiteqqinneqarsimanerannik oqaluttuarnera eqqunngilaq.
Eqqoqqissaartussarlu pillugu ilannguttariaqarpoq SIK-p isumaginninnermut aningaasaateqarfia ineqarnermut akiliussisarmat – taamaattumillu aningaasat tapiiffigineqartup peqqissartut illuannut akiliutigeqqaarsimasai aningaasaateqarfimmit utertinneqareermata.
Taakkua saniatigut isumaginninnermut aningaasaateqarfiup qinnuteqarneq tunngavigalugu makku matussusertarpai – aamma suliassami pineqartumi:
- Sulinngikkallarnermi akissarsiatigut annaasaqaatitit, qanigisamik perululluni napparsimasumik najuinermut tunngatillugu.
- Angalanermut aningaasartuutit – timmisartumut il.il. bilitsinut.
- Danmarkimi rejsekorti.
SIK-mi neriuutigaarput qulaani taaneqartut SIK-p isumaginninnermut aningaasaateqarfimmik qanoq ingerlatsineranut eqqortumik paasinninnissamut tunngavissaalluassasut.
SIK-p isumaginninnermut aningaasaateqarfii pillugit paasissutissat erseqqinnerusut uaniipput: https://sik.gl/sik-pillugu/aningaasaateqarfiit/isumaginninnermut-aningaasaateqarfiit/