Tallimanngornermi 31. marsi 2023 sulisartut kattuffiata SIK-p Nakkutilliisoqarfia ataatsimiissaaq. Ataatsimiinnermi taamaattumi sinerissamit aallartitat peqataasarput, kattuffiup ukiut sisamakkaarlugit ataatsimeersuartarnerisa akornanni ataasiarlutik. Nakkutilliisoqarfiup ukioq manna ataatsimiinnera Nuummi Hotel Hans Egedemi pissaaq.
SIK-p kattuffittut immikkoortortaanit peqatigiiffinnit 20-usunit aallartitat taamaalillutik katersuutissapput.
Nakkutilliisoqarfiup ataatsimiittarnera kattuffiup malittarisassai naapertorlugit makkuninnga siunertaqarpoq:
- Ataatsimeersuarnerit akornanni SIK-p ingerlatsinera aalajangiiffigissallugu.
- Isumaqatigiinniarnissani piumasaqaatissanik saqqummiussissalluni.
- Siulersuisuunerit ataatsimeersuarnermi nakkutilliisoqarfimmilu aalajangikkat naapertorlugit sulinerat nakkutigissallugu.
- SIK suliffeqarnerlu pillugit taasassat assigiinngitsut oqallisigissallugit.
- Ukiuni tulliuttuni marlunni ilaasortat kattuffimmut akiliutissaat aalajangiiffigissallugit.
Tallimanngorpat ataatsimiinnissami ullormut oqaluuserisassat kattuffimmi maanna ingerlatanut assigiinngitsunut tunngassuteqarput:
SIK-p Inuusuttaasa sulisartut kattuffianni ersarinnerusariaqarnerat. Isumaqatigiinniarnerni kingullerni angusat (Nakkutilliisoqarfiup ataatsimiinnera sioqqullugu isumasioqatigiinnermi nassuiaatigineqartut). Sulisut sinniisaasa atugarisaat taakkualu pikkorissarneqartarneranni qanoq aaqqissuussinissaq. Kiisalu aamma Isumaginninnermut Aningaasaateqarfiit SIK-p isumaqatigiissutai malillugit sulisuusunit atorluarneqartorujussuit pillugit arlalinnik saqqummiussisoqartussaavoq.
Taasariaqarportaaq peqatigiiffiit ilaannit apeqquteqaatigineqarmat nunatsinni sulisussatut avataanit tikisitat SIK-p isumaqatigiissutaanik atuinerata nakkutigineqarnissaanut periusissiortoqarniarnersoq.
► Una tooruk Nakkutilliisoqarfiup ataatsimiinnerani oqaluuserissat aajumallugit
