Nakkutilliisoqarfik ataatsimiisinneqaannarnialerpoq

Nakkutilliisoqarfik 10. decembari 2020 videokkut ataatsimiittussanngorpoq. Ataatsimiigiaqqusissut nassiunneqaqqammerpoq.

SIK-p Nakkutilliisoqarfiata ukioq manna ataatsimiinnissaa corona pissutigalugu marsimili marloriarluni kinguartinneqartoq ingerlanneqartussanngorpoq. Tamanna pissaaq sisamanngornermi 10. decembari 2020, telefonikkut/videokkut illoqarfinnit arfinilinnit ingerlanneqassalluni.

Nakkutilliisoqarfik kattuffiup immikkoortortaasa tamarmik aallartitaasa peqataaffigisaannik ukiu­moor­tumik ataatsimiittarpoq. Ukioq manna Nuummi ataatsimiinnissaat pilersaarutaaqqaaraluarpoq.

Coronali pilermat ataatsimiinnernillu killilersuisoqalermat SIK-p periaatsinik allanik periarfissarsi­or­tariaqalerpoq.

Marloriarluni kinguartitsisoqareersorlu maanna pilersaarutaalerpoq Nakkutilliisoqarfik ataatsimiissasoq, illoqarfimmi ataatsimiinnaanngitsoq, illoqarfinnili arfinilinni ukunani telefonikkut videokkullu atassuserluni ingerlanneqassalluni:

Qaqortoq: Aallartitat Kommune Kujallermeersut tassani issiaqatigiissapput (Nanortalimmi, Alluitsup Paani, Narsami Qaqortumilu immikkoortortanit).

Nuuk: Aallartitat Kommuneqarfik Sermersuumeersut (Nuummi, Paamiuni Qeqertarsuatsiaanilu immikkoortortanit) kiisalu siulersuisuunerit tassani issiaqatiiissapput. Tassanngaanniillu ataatsimiinneq aqunneqassaaq.

Tasiilaq: Tasiilami immikkoortortap aallartitaa tassanngaannit peqataassaaq.

Kangerlussuaq: Aallartitat Qeqqata Kommunianeersut tassani issiaqatigiissapput (Sisimiuni, Maniitsumi, Kangaamiuni Kangerlussuarmilu immikkoortortanit).

Aasiaat: Aallartitat Kommune Qeqertalimmeersut tassani issiaqatigiissapput (Qeqertarsuarmi, Qasigiannguani, Kangaatsiami  Aasiannilu immikkoortortanit).

lulissat: Aallartitat Avannaata Kommunianeersut tassani issiaqatigiissapput (Qaanaamit, Upernavimmit, Uummannamit, Ikerasammit Ilulissanillu).

Piareersarluarnissaq pingaaruteqarpoq

Ullormi 10. decembari 2020-mi pisussat pilersaarusiorneqaleruttorput – SIK-p siunissami qanoq aaq­qissuussaanissaa pillugu ullup qeqqata siorna isumasioqatigiittoqartussanngorlugu. Ualikkut Nak­kutilliisoqarfimmi pisarnertut ullormut oqaluuserisassat ingerlanneqassapput, soorlu siulersuunerit nalunaarutaat, immikkoortortaqarfiit siunnersuutaat il.il.

Kisianni Nakkutilliisoqarfimmi pisussat ullormi siulianili, tassa decembarip qulingiluaani, aallartittussatut pilersaarusiorneqarput. Aallartitat illoqarfinnut taaneqartunut taamaalinerani tikereer­simassapput, taamalu immikkoorlutik tikiffimminni ulloq taanna piareersarfiusumik ataatsimiissapput, aqaguani decembarip qulingani Nakkutilliisoqarfiup tamarmiusup telefonikkut/vide­okkut ataatsimiinnissaani oqaluuserisassanut piareersarlutik.

Tassami piareersarluarnissaq immikkut ittumik pingaaruteqartussaavoq, tassa Nakkutilliisoqarfiup ataatsimiinnissaa taanna kattuffiup oqaluttuarisaanerani misilinneqarsimanngitsumik ilusilerlugu ingerlanneqartussaammat.