Nutaamik isumaqatigiissuteqarnikkut NSIP aamma SIK sulisartut peqatigiiffeqarneranni ulluinnarni isumagisassatigut suleqatigiinnerulerput.
SIK-p Nuummi immikkoortortaqarfia, NSIP, 900-t sinnerlugit ilaasortaqarluni immikkoortortaqarfinnit annersaasoq, maanna juunip aallaqqaataaniit SIK-p allattoqarfianit allaffissornikkut sullinneqalerpoq.
NSIP allaffimmiumik atorfeqartitaqarniarunnaarmat, immikkoortortaqarfimmut ilaasortat ilarpassui ulluinnarni SIK-p allattoqarfianit sullinneqareermata – aammalumi immikkoortortaqarfik kattuffillu illoqatigeereermata – pissusissamisoorlunilu naleqquppoq tamatuminnga isumaqatigiissuteqassalluni.
Isumaqatigiissutip imarisaa tassaavoq NSIP-p siulittaasua siulersuisuilu SIK-p allattoqarfiata pisariaqartutigut assigiinngitsutigut sullitarilissagai. Tamatumani ilaatigut pineqarput suliffeqarfinnut pulaaqattaarnissat pilersaarusiorneqarnerat ingerlanneqarnissaallu, sulisut sinniisuinik ataatsimeeqateqartarnerit, siulersuisut ataatsimiittarneri aamma inunnut tunngasutigut suliassaalersartut.
Isumaqatigiissut 2020-p naalernerani nalilersoqqinneqarumaarpoq 2021-mi nangeqqinnissaa isummerfigineqartinnagu.
NSIP-p kattuffiullu taama isumaqatigiissuteqarnermikkut suleqatigiilluareernertik nukittorsaqqinniarpaat, tamatumani pineqarmat oqarluartaarutip ”Ataatsimoorutta nukittunerussaagut” timitalersorneqarnissaa, kattuffimmi ataasiusumiinnerput nassuerutigalugu.
