SIK-p allattoqarfiata Nuummi sulisartut peqatigiiffiannut NSIP-mut illoqarfimmi sulisartoqarnikkut suliniutitigut allaffeqarnikkut sullissinissaanik isumaqatigiissut sivitsorneqarlunilu ineriartorteqqinneqarpoq.
Taama 2020-mi isumaqatigiissuteqartoqaqqaarpoq. Aammami kattuffik peqatigiiffillu illorsuarmi ataasiusumi allaffeqareerput, ilaasortallu peqatigiiffimmut atassuteqartut ullut tamaasa kattuffiup allattoqarfianukartarput arlaannik pisassaqarlutik sullinneqarlutillu. NSIP-lu aalajangermat nammineq allaffimmiumik atorfeqartitaqarunnaarniarluni, allaffimmioqarnikkut pisariaqartitat SIK-mik isumaqatigiissuteqarnikkut matussusissallugit pissusissamisoorsimavoq.
Isumaqatigiissutip ukiumik ataatsimik sivitsoqqinnissaa, tassa 2024-p naanissaata tungaanut, ulloq 4. decembari 2023 isumaqatigiissutigineqarpoq.Isumagisassat ilaatigut makku isumaqatigiissummut ilaapput: Peqatigiiffiup mobiliata nakkutiginissaa, suliffeqarfinnut pulaarnissanik pilersaarusiorneq, siulersuisut ataatsimiinnerini allattuuneq, ilaasortanut tunngasunik suliassat kiisalu illoqarfimmi sulisut sinniisorpassuinik suleqateqarneq.
NSIP-p siulittaasuata Josef Therkildsenip SIK-milu allattoqarfiup pisortaata Bjarne Petersenip peqatigiiffiup allaffeqarnikkut sullinneqarnissaanik isumaqatigiissut atsiorpaat.