NSIP-p qanimut suleqatigineqarnera nangissaaq

NSIP-p siulersuisui aalaja­ngerput SIK-p allattoqarfiata suleqatigineqarnera sullissineralu 2021-mi nangissasut.

Ukioq manna juunimi SIK-p Nuummi immikkoortortaqarfiata NSIP-p kattuffiup allattoqarfia allaffissornikkut sullinneqarnissamik isumaqatigiissuteqarfigaa. NSIP-p siulersuisui aalaja­ngeqqammerput suleqatigiinneq sullissinerlu tamanna 2021-mi nangissasoq.

Aammami tamanna tulluaannarpoq. SIK aamma NSP illoqatigeereerput Issortarfik 11-mi (aammattaaq soraarnerussutisiassanik aningaasaateqarfik SISA illoqatigalugu), immikkoor­tortaqarfiullu ilaasortai assigiinngitsunik pisassaqarlutik tassunngarajuttuupput. Ilami aam­ma tamatta kattuffik ataasiusoq ilaasortaaffigaarput siunertat taakkuusut anguniagaralutigit.

Suleqatigiinnissamik isumaqatigiissummi ilaatigut pineqarput suliffeqarfinnut pulaaqattaar­nissat pilersaarusiorneqarnerat ingerlanneqarnissaallu, sulisut sinniisuinik ataatsimeeqate­qartarnerit, siulersuisut ataatsimiittarneri aamma inunnut tunngasutigut suliassaalersartut.

Isumaqatigiissutip nangissutaani ilanngunneqarpoq NSIP-p socialmediatigut (soorlu Facebookikkut) attaveqaatilersornerani SIK-p allattoqarfia ikiuutissasoq.

Nuummi Sulinermik Inuussutissarsiuteqartut Peqatigiiffiata (NSIP) siulitaasua Josef Therkildsen (Ujoorsi) SIK-llu allattoqarfiani pisortaq Bjarne Petersen isumaqatigiissummik atsiortut.