Qillertuusaralaat maani nunami atorneqartalernissaat piinnarlugu Nuuk Imermi sulisut 35-it suliffeerutilerput. Taamatullu aamma akileraarutitigut isertittakkat 4,2 mio. kronit annaaneqassallutik.
Siullermik SIK-mi assut paatsuungavugut, tassami maannakkut pisiniarfippassuarni imigassat assigiinngitsut qillertuusamiittut tuniniarneqarput, sunaaffa inerteqqutaasoq. Qinikkat tamanna ilisimannginnerassappassuk tappiissimassaqaat, tamarmimmi ersipput. Tupinnaqaaq qanoq iliuuseqartoqanngimmat, uffa sunaaffa inatsisinik unioqqutitsinerusoq.
SIK-mi isumaqarpugut aperisoqartariaqartoq taamatut nunatsinni qillertuusat ammaanniarneqarnerat sumik siunertaqarnersoq. Siunertaqarpa maani nunami imertakkatta akikinnerulernissaannik? imaluunniit inuit ataasiakkaat allarluinnarmiik paajatorumanerannik peqquteqarpa?
Ilaasortatta Nuuk Imermi maqitsinermik ukiorpassuit suliaqarnermikkut suleriaaseq taanna ilisimmaarilersimavaat. Isumaqarpugut sulisut ilisimmaarilersimasaat iluatigineqartariaqartoq, tassami Nuuk Imeq, matuppat ukiorpassuit ilinniagaat / ilisimaligaat imaasiinnarlugu nunatsinni atorneqarsinnaajunnaassaaq.
Taamaattumik paaserusunnarpoq sunarpiaq peqqutigalugu maani nunatsinni qillertuusat aammaanniarneqarnersut – allaat sulisut 35-t pilliutigalugit, aammalu akileraarutitigut aningaasat isertitassaraluit aannaaneqartussanngorlugit, minnerunngitsumillu sinneqartoortarnermi Sermersooq Kommunia aamma pissarsisarunnaassaaq, taamaattumik isumaqarpugut nalilersueqqissaartoqartariaqartoq taamatut qillertuusat maani nunatsinni inerteqqutaajunnaarsinneqarnissaannut aaliangertoqartinnani.
Jess G. Berthelsen
Kattuffiup siulittaasua