Nuummi paasisitsiniaajutigaluni ilaasortassarsiornermi inunnik oqaloqatiginninnerit kajumissaataalluartut ingerlanneqarputtaaq.
Niuerfimmut inuit ornigarluartagaannut nerrivimmik paasissutissaasivimmik inissiilluni ilaasortassarsiupallanneq assigiinngitsorpassuarnik iluaqutissartaqarpoq. Tamanna Emma Junge Dalagerip aamma Inge-Marie Rosingip, tamarmik SIK-mi siunnersortitut sulisuusut, misigaat juunimi sapaatip-akunnerani kingullermi taamatut ilaasortassarsiornermik ingerlatsinertik aallarneramikku Nuummi Sulinermik Inuussutissarsiuteqartut Peqatigiiffiat (NSIP) sinnerlugu.
Soorlu Brugsenip isaariaata eqqaani taamaaliorput paasissutissanik, ussassaarutinik ilaasortanngornermilu immersugassanik nerrivimmut inissiillutik.
Tamatumani siunertarpiaavoq sulisartut peqatigiiffiannut nutaanik ilaasortassarsinissaq – aammami qujanartumik nalunaaquttap-akunnerisa marluk ingerlaneranni arlalinnguanik ilaasortanngortoqarpoq.
Aammali inuit paaserusutaminnik apeqqutissaqarlutik aggertarnerat immini kajumissaataallunilu pitsaasuuvoq sulisartut peqatigiiffiata nunaqqatigiinnut attaveqarneranut tunngatillugu. Soorlu sammineqarput sulisartut peqatigiiffiannut ilaasortaaneq soraarnerussutisiassanillu akilioraanerit imminnut qanoq attuumassuteqarnersut. Aammaluunniimmi angut utoqqannguaq takkukkami qangalu sulisunut sinniisuusimanerminik oqaluasaalerluni.
Brugsenip isaariaani misigisanik Inge-Mariep allattugai ilaatigut makkuninnga paasisaqarfiupput:
- Ilaasortanngortoq ilaasortanngornermi immersugassamik immersuitinnani makkuninnga paasiniaaqqaarpoq: Sunik pisinnaatitaaffeqarpunga? Ilaasortaaneq sutigut iluaqutissartaqarpa? Feriefondimut Socialfondimullu qinnuteqarsinnaassaguni suliffia pinngitsoorani aningaasaateqarfinnut taakkununnga akiliuteqartartussaava?
- Inuit soraarnerussutisiassanik aningaasaateqarfik SISA aamma sulisartut kattuffiat SIK akuleriissippaat. Isumaqarput SISA-mut akilersuigamik taava SIK-mut ilaasortaalersimassallutik.
- Ilaat oqalupput Feriefondimut qinnuteqarfissaq qarasaasiamikkut aasinnaanagu.
- Isumaginninnermut aningaasaateqarfiit (socialfondit) tallimaasut taakkualu periarfissarititaat pillugit inuppassuit ilisimasaqanngillat. Taamalu Inge-Marie inerniliivoq paasissutissiinerup tungaatigut imaannaanngitsumik suliassaqartugut.
Ilaasortassarsiorneq aamma aqaguani iluatsilluarpoq tamatumuuna Nuuk Centerimi. Nerrivimmut paasissutissaasivimmut orniguttoqangaatsiarpoq ilaasortanngorusuttunik, pingaartumik Feriefondi Socialfondillu pissutiginerullugit – taakkuugamik aaqqissuussinerit pitsassuit ukiut ingerlaneranni SIK-p sulisitsisunik isumaqatiginninniartarnermigut angusimasaasa ilaat.
Aammali ilaasortaareersunik takkuttorpassuaqarpoq kattuffiup ussassaarutaanik ilangiilaarusuttunik, tassa inukkanik, ikittaatinik lakridsinillu (tamakku nuannarineqarluinnaramik).
Illoqarfiit pingaarnersaanni nerriviit paasissutissaasiviit atortoralugit ilaasortassarsiorneq ingerlaqqissaaq illoqarfiup immikkoortuani inuppassualimmi Qinngutsinni.
Aamma atuaruk: ”Ilaasortassarsiupallanneq iluatsilluartoq” – Ilulissani sulisut sinniisaat pisiniarfiit pingasut paarliinut inissillutik ilaasortassarsioramik akunnerup aappaata affaata ingerlanerani 15-inik nutaanik ilaasortassarsipput.
