SIK-mi ilasortatta ukiut 15-it Nuummi initaarniarlutik utaqqisariaqartarnerat qinikkat sequnngerlutik isiginngitsuusaaginnarniarnerpaat?SIK-mi ilasortatta ukiut 15-it Nuummi initaarniarlutik utaqqisariaqartarnerat qinikkat sequnngerlutik isiginngitsuusaaginnarniarnerpaat? SIK-p siulittaasua aperivoq.
SIK-mi ilasortatta ukiut 15-it Nuummi initaarniarlutik utaqqisariaqartarnerat qinikkat sequnngerlutik isiginngitsuusaaginnarniarnerpaat?
Siorna 23. marts 2019 Grønlands Erhverv, GE-p ataatsimeersuarneranut atatillugu partiit tamarmik peqataaffigisaannik oqallitsitsisoqarpoq, taamanikkullu ilaatigut uanniik apeqqutigineqarpoq Kommuuneqarfik Sermersuup siunniussaa qanoq eqqarsaatersuuteqarfigineqarnersoq, tassa ukioq 2030-mi maani Nuummi 30.000-ngornissarput.
Taamanikkut partiit tamarmik – malugalugu tamarmik oqariartuutigaat namminneq inuit qanoq nuttarniarnersut qanoq iliuuseqarfigisinnaanagu.
Naatsumik oqaatigalugu imatut nalilerneqartariaqarpoq – akueriinnaraat taamatut siunniussisoqarnera. Tassalu Nuuk alliartuinnassasoq aammalu siunissami Nuummi innuttaasut 30.000-inngornissarput akuerigaat.
Taava kialluunniit takorloorsinnaavaa Nuummi inissaaleqineq appariartulernavianngitsoq, aammalu immikkut qanoq iliuuseqartoqartariaqartoq ilaasortatta akilersinnaassaannik ukiut 15-20-it initaarniarlutik utaqqiuaannassanngippata.
Isumaga naapertorlugu taamatut Nuummi amerliartuinnarnitsinnut akuersaarneq aamma pisussaaffiliivoq. Maannakkummi ilaasortarpassuagut angajoqqaaminni, ilaquttaminni najugaqartariaqartarput inissamik tunineqarsinnaaneq ajoramik, imaluunniit inissiamik akilersinnaasaminnik tunineqarsinnaannginnamik.
Nalunngilara politikerit ilai oqassasut Kommuneqarfik Serrmersuup nammineq tamanna akisussaaffigisariaqarpaa. Taamatulli oqariartorniartunut isumaqataanngilluinnarpunga, tassami Kommuneqarfik Sermersuup kisimi tamanna kivissinnaanngilaa. Eqqaamallugumi sinerissaminngaaninguna ilaasortagut maanga nuuttartut ilaatigut sinerissami suliffissaqannginnertik peqqutigalugu, tamattalumi akisussaaffigaarput sinerissami suliffiusinnaasunik pilersitsinissaq.
Taamaattumik partiit, Inatsisartunut ilaasortat pissutit tamaannerat akuersaaginnarassiuk aamma ilissi pisussaaffeqarpusi Nuummi inissianik ilaasortatta akilersinnaassaannik saanaartortitsinissamut suleqataassallusi.
Kialluunniimmi takorloorsinnaavaa qanoq inummut erloqinartigissasoq kikkuugaluarnersuni inissisimasuulluni utoqqatsikululluni, inullu ulluinnarni utoqqatsikululluni inisimasoq alloriaqqinnissaminut periarfissai annikitsuararsuusarput.
Taamaattumik qinikkat akisussaaffimmik tigusillusi Nuummi ilaasortatta ukiut 15-20-it initaarniarlutik utaqqisariaqartannginnissaat pinngitsoortinniarlugu qanoq iliuuseqarfiginiarsiuk, sulisartukkormiullu akilersinnaassaannik inissialiortitsillusi.
Jess G. Berthelsen
Kattuffiup siulittaasua