Assorsuaq tupaallaatigaara maanna partii Siumut Kuannersuarni aatsitassarsiornissamik pilersaarut pillugu tusarniaanernik kinguartitseqqusisunut ilanngulluni nalunaarmat.
Maannakkut ajuusaarnaraluatumik Kujataa ataatsimut isigalugu inuerukkiartorpoq, min-nerunngitsumik Narsaq. Tassanilu soorunami peqqutaanerpaajuvoq suliffissaaleqineq.
Narsami Ilaasortavut amerlasuut maannakkut suliffissaaleqipput. Ukiorpassuimmi qaangiupput Narsami suliffinnik nutaanik kingullermik pilersitsisoqarmat. Narsami illut matuuinnakkat ajuusaarnaraluartumik amerligaluttuinnarput.
Taamaattumik SIK isumaqarpoq suliffimmik nutaamik Narsami pilersitsisoqarnissaa pisariaqarluinnartoq. Imaanngitsoq suliffissaq nutaaq pineqartoq taamaallaat Narsami suliffissaqartitsissammat, kisiannili nunarput aamma ataatsimut isigalugu annertuumik suliffissaqartitsisussaammat aningaasarsiorfiullunilu. Tassami ajuusaarnaraluartumik nunatsinni sumiiffiit ilaanni aammattaaq sulifissaaleqineq annertoqaaq.
Partiip Siumup paasisariaqarpaa qanorluunniit atsigisumik paasisitsiniaasoqaraluarpat Inuit Ataqatigiit oqartuassasut paasisitsiniaanerit naammanngitsut. Tassami Inuit Ataqatigiit politikkeraat nunatsinni uranimik akulimmik piiaasoqassanngilluinnartoq. Imaappoq 100-riarluniluunniit paasisitsiniaasoqaraluarpat suli paasisitsiniaasoqarnissaanik Inuit Ataqatigiit piumasaqartuassapput.
Ilumut aamma qulakkeerlugu paasineqarsimanerluni Narsami inuuttaasut qassit pilersinniakkamut akerliunersut?
SIK neriuppoq aatsitassarsiorfissaq pisariaqanngitsumik kinguarsaqqinneqassanngitsoq.
Kinaana oqartoq Kujataani aatsitassarsiorfigineqarsinnaasoq alla Killavaat uranimik akoqanngvissoq?
Jess G. Berthelsen
SIK-p siulittaasua