Sulisartut akissarsiatigut ullumikkut inissisimanerat ajorluinnartumik oqaatigineqartariaqarpoq.
Pisortat suliffeqarfiutaanni kommuninilu sulisut suunngilluinnartutut sulisitsisuminninngaanniit naleqanngitsutut, suunngitsutut inissisimatinneqarput.
Allaammi suusupagingaaramikkit taamaallaat nalunaaqutap-akunneranut 1 kronimik qaffaaviginiarlugit neqeroorfigaat, pisortallu suliffeqarfiutaasa, soorlu KNI-p aamma taamatut sulisutik suusupagitigaat. Nammaginartumik inuussutigisinnaasaannik aningaasarsiatigut qaffaavigerusunngilaat, naak tanngassimaangaarlutik kikkut tamat tusaasinnaasaannik sinneqartoorussuatik, sulisut sulerulunnermikkut pilersitaat, taakkartortarlugit.
Illuatungaatigut akissaqartoqarpoq milliardit arlallit atorlugit mittarfissualiornissamut, taakkugooq talligutsigit tamatta atugarissaarnerulissagatta. Kikkunuku atugarissaarnerulissasut, Qaanaarmiut? Aasiammiut? Sisimiormiut? Tasiilarmiut?
Arraa, kikkunuku taakku mittarfissaarsuassat atorniaraat? Ilaasortavut massakkut taakku mittarfissaarsuit atussallugit akissaqanngilluinnarput – ila ila, maannakkut aningaasarsiamininnguatik taamak annikitsigimmata timmisartoqattaassallutik akissaqanngillat.
Ilaasortavut sulisartut suusupagingaaramikkit naammaginartumik qaaffaaviginianngilaat, illuatungaatigulli suliffeqarfiutiminni siulersuisutik qarluallattullu aningaasarpaalukasinnik qaffaavigalugit.
Naanguna innuttaasunik pingaartitsineq?
Ulluinnarni oqariartulissapput meeqqat atugaat ajorpallaaqaat pitsanngorsaavigineqartariaqarput. Tunngaviatigut tamanna isumaqatigeqaarput, kisianni meeqqat atukkatik sulillutik pitsanngorsassagamikkit? Meeqqat atugaat pitsaanerulissappata taava politikerit qanoq eqqarsaramik, meeqqat aningaasarsiaqartilerniarlugit imaluunniit qanoq?
Naamik! Meerartatta atugaat pitsaanerulissappata taava angajoqqaat atugaat pitsaaneruleqqaartariaqarput. Tassa imaappoq angajoqqaat aningaasarsiaasa pisissutigineqarsinnaanerat pitsanngorsaavigineqarluinnartariaqarpoq meeqqat atugaat pitsaanerulersinneqassappata.
GE avammut suaalissaaq maani nunami meerartatta atugaat pitsaanerulertariaqartut, atuartitaaneq pitsaanerulertariaqartoq. Kisianni taakkuupput maani nunami annikinnerpaamik aningaasarsiaqartitsisut. Atagu oqarluartaaginnaratik GE-p siulersuisui qanoq iliuuseqarniarlik meerartatta atugaat ulluinnarni pitsaanerulerseqqullugit – tassalu isumaqatigiinnialerutta naammaginartumik aningaasarsiatigut qaffaallutik. Taamaalillutik ilaqutariippassuit pitsaanerungaartumik inissisimatilissavaat, angajoqqaallu atuartuutitik meeqqat ikorfartussallugit nukissaqarnerulissallutik.
Sulisartoqatikka, maani nunami naammagittarnersi tassunga killeqartariaqarpoq. Nikussaartariaqalerpugut ulluinnarni atukkavut pitsaanerulersinniarlugit.
Sisimiut, 22. januaari 2019
Jess G. Berthelsen
Kattuffiup siulittaasua