“Isumaqarpunga uani paaqqinnittarfiit ulluinnarni ingerlanneqarnissaannut pingaaruteqarluinnartumik suleqataasut puigorneqartut, “SIK-p siulittaasua allappoq perorsaasut akissarsiaasa sammineqarnerannut tunngatillugu.
Perorsaasut akissarsiaat sapaatip-akunnerani qaangiuttumi taakkartorneqartunut ilaapput. Perorsaasullu naammaginninnginnermik takutitsiniarlutik Inatsisartoqarfiup sioraanut katersuukkamik politikerinit neriorsumisaarneqarput iluarsiiffigineqarumaarnerminnik.
Soorunami perorsaasut qutsatissaqaakka akissarsiaat qaffanneqassappata.
Taama oqariarlunga ingerlaannaq eqqaasitsissutigisariaqarpara paaqqinnittarfinni taakku kisimik ingerlatsisuunngimmata. Meeqqanimmi paaqqinnittarfik ingerlasinnaanngilaq perorsaasut sulisunik allanik ikiorteqanngippata. Maannakkullu paaqqinnittarfiit ingerlasinnaanngilluinnarput SIK-p isumaqatigiissutai malillugit sulisunik ikiorteqanngikkunik. Paaqqinnittarfik ingerlanneqarsinnaanngilaq asaasoqanngippat, iggavimmi sulisoqanngippat, paaqqinnittarfinni inini ilinniarsimanngitsunik ikiorteqanngippat.
Isumaqarpunga uani paaqqinnittarfiit ulluinnarni ingerlanneqarnissaannut pingaaruteqarluinnartumik suleqataasut puigorneqartut. Tupiginngilaralu paaqqinnittarfiit ingerlanneqarneranni qimunnerpaat taakku taamatorluinnaq misigisimammata. Akerliussutsimik takutitsigutta aamma uagut politikerinit Inatsisartut ataatsimiittarfiata silataani neriorsorneqassanerpugut akissarsiavut qaffassasut?
Naatsorsuutigaara uagut isumaqatigiinnialerutta ilaasortavut ulluinnarni paaqqinnittarfiit ingerlanneqarneranni qimuttut aamma taamatut aningaasarsiamikkut qaffaaffigineqassasut.
Aammami maannakkut annertuumik inulerineq eqqarsaatigalugu sulisussanik amigaateqarpugut. Tamatumani pineqarput utoqqaat angerlarsimaffiini, peqqinnissarfinni il.il. sulisut. Taakkumi qanoq eqqarsaatersuutigineqarpat?
Jess G. Berthelsen
Kattuffiup siulittaasua