Peersitsinernik tunngavilersorluagaanngeqisunik assersuutissat

Sulisitsisut sulisuminnut torersumik pinninnissaat SIK-p ilungersutigisarpaa, aamma sulisartut allamiut pineqaraangata.

Eqqarsariaallannanngitsuunngilaq 2020-mi novembarimi ullut ilaanni soraarsitsinerit (peersitsinerit) ataatsikkut pingasut SIK-mut suliassiissutigineqarmata – asuluunniimmi taakku tamarmik suliffimmi ataatsimi pisimallutik. Tamarmillu tunngavilersorluagaanngitsumik so­raar­­sitsisoqartarneranik sulisu­llu ajortumik pineqartarnerannik assersuutissaallutik – SIK-mut ilaasortat sissuerluinnagassaat. Taamaattunik pisoqaraangat kattuffik ilisimatinneqartarli.

Pisimasut SIK-mut suliassiissutigineqarput ilaasortanit pingasunit, tassa thailandimiunit neriniartarfeqarnermi sulisuusunit. Sulisitsisuata taakku peersissimavai suut pissutaanersut naat­­sumik ilisimatitsissutigalugit. Pissutaasutulli oqaatigineqartut sulisut assortorpaat er­seq­qinnerusunillu nassuiaatissaqartillugit.

Peersitsineq tassaavoq soraarsitseriaatsit ilaat imaannaanngitsoq – tassa ingerlaannaq atuu­tilersumik, imaappoq siumoortumik kalerriutigeqqaarnagu, soraarsitsineq.

Taama pineqaatissiineq sulisitsisup nalinginnaasumik aatsaat atorsinnaavaa sulisoq allakka­ti­gut mianersoqqussummik tunineqarsimappat thailandimiut taakkua pingasut kukkuluttuu­tigisimasaattut taaneqartunut assingusunik kukkuluttuuteqarsimanermikingunerisaanik.

  • Suliassiissutigineqartuni taakkunani tamani sulisitsisoq siumoortumik kalerreeq­qaar­nani peersitsisimavoq.
  • Peersitsinernut taakkununnga tunngavilersuutit piviusorsiortut erseqqissullu amigaataapput.
  • Taamaattumik SIK-p ilaasortani taakkua pingasut sinnerlugit sulisitsisoq qinnuigaa peersitsinerit taakku erseqqinnerusumik nassuiaateqarfigeqqullugit.
  • Aammattaaq apeqqutit ilaatigut uku SIK-p erseqqissaateqarfigeqquai:
  • Nalunaaquttap-akunnerpassuini qaangiuttoornerit akilerneqarsimanngitsut – SIK-p naatsorsuinera naapertorlugu ukiut pingasut qaammatillu pingasut ingerlaneranni allaat 686.400 kr.-inngorsimasut, sulisunut marlunnut tunngatillugu.
  • Sulisitsisup aammattaaq nassuiartariaqarpaa soraarnerussutisiassanut aamma sulin­ngiffeqarnersiutissanut qanoq akiliisimanerluni, taamatuttaarlu sulisut ineqartinne­qarnerannut qanoq akiligassiisarsimanerluni.

Qulaani taaneqartut sulisitsisut ilaasa sulisartunut allamiunut qanoq pinnittarsimanerannik SIK-mut suliassiissutigineqartunik takussutissiipput. Tassami ilaasortatsinnut Filippinerinit Thailandimillu kingoqqisunut tunngatillugu suliassat arlallit ingerlappavut – soorlumi tamanna aamma tusagassiuutitigut sammineqarsimasoq.

Suliffeqarnermut tunngatillugu apeqqutigineqarajuttut akissutillu – una tooruk.