Siulittaasup tullia Jokum Zeeb aamma siunnersorti Inge-Marie Rosing maanna 2022-p ukiaanerani kingumut qiviassajunnarsipput apriilimit juunimut angalanerpaalussuatik eqqaallugit – amerlanertigut marluullutik, aammali immikkoorlutik – SIK-p aaqqissuussaanermini tunngavigisaasa sulisartut peqatigiiffiisa 20-usut affangajaat tikeraaramikkit.
ASSIT: Angalanermi takusat ilanngui allaaserisap ataaniipput
Piffissami taaneqartumi uku tikeraarneqarput: Paamiut, Sisimiut, Kangerlussuaq, Ittoqqortoormiit, Narsaq, Nanortalik, Qeqertarsuatsiaat, Uummannaq aamma Ikerasak.
Taamalu kattuffiup siulersuisuunerisa aggustimi ataatsimiinnerannut Inge-Marie Jukkulu tamarmik allagaqarlutik nalunaarusiorsimapput angalanerminni paasisaminnik, soorlu ilaasortat allallu ilaasortanngorsinnaasut sunik soqutigisaqarnerannik.
Nalunaarusiat alakkarterlugit Ittoqqortoormiini Narsamilu misigisanik allaaserisat maluginiarnartunut ilaapput.
Ittoqqortoormiini ilaasortanngorlaat 46-t
Kammalaativut SIK-meersut marluk Ittoqqortoormiinut pipput ulloq 23. maaji, asuluunniimmi Reykjavikkikkoorlutik, soorlumi taama pisartut. Utimullu aamma taamatut.
SIK-p kattuffittut aaqqissuussaanera atuuttoq tunngavigalugu Ittoqqortoormiini immikkoortortaqarfik ukiuni tulleriinni 2019-20-mi peqatigiiffittut ilaasortakippallaalermat, tassa ilaasortat 35-nit ikinnerulermata, atorunnaarsinneqarpoq. Taamalu Ittoqqortoormiini ilaasortat peqatigiiffeqanngikkaluarlutik SIK-p Nuummi allattoqarfianut toqqaannartumik atassuteqalerput.
Tikeraat Ittoqqortoormiinut pimmata tassani ilaasortat 17-it nalunaarsorneqarsimapput. Ulluni tikeraarsimaffiusuni ilaasortanngortorpassuaqarpoq, aallarmatalu ilaasortat nutaat 46-nngorsimapput.
SIK-mit tikeraat ilassilluarneqaqaat. Tikeraartoqarneratigullu SIK-p suliffinni assigiinngitsuni attavigisinnaasai ilapput, tassa sulisut sinniisaannik nutaanik toqqaasoqarmat.
Siunnersorti Inge-Marie Rosing nalunaarusiamini Ittoqqortoormiini innuttaasunik ataatsimiititsineq ima oqaatigaa: „Inuit 35-t tungaannut takkupput, saqqummiussavullu tamaasa qujamasuutigaat. Ersaartaattuinnaappullu ilaasortanngortut amerlasuut nalunaarutigineqarmata. Peqatigiiffinngoqqinnissartillu assut angorusuppaat.“
Narsami peqatigiiffik ingerlaqqilerpoq
SIK-mi siunnersorti juunip naajartornerani Narsamut tikippoq tassani peqatigiiffik siulersuisuerussimasoq, tassa siulersuisunut ilaasortat amerlanerit tunuarsimammata – siulittaasuugallartorlu Isak Josefsen taamaalilluni immikkut ittumik ataatsimeersuarnissamik piareersaaleruttorsimavoq. Narsami SIK-mut ilaasortat upernaaq 118-iusimapput.
Ataatsimeersuarneq ingerlanneqarpoq. Ilaasortat 14-it najuupput. Inge-Marie SIK pillugu saqqummiussivoq. Taava siulersuisussanik qinersisoqarpoq, Otto Davidsenilu siulittaasunngorpoq.
Siulersuisunngortut pisariaqartinneqartumik pikkorissarneqatsiarput SIK-p kattuffittut aaqqissuussaanera malittarisassallu pillugit, aamma peqatigiiffilerinermik – tamatumalu malitsigisaanik siulittaasoq peqatigiiffimmi allaffissornermut tunngasunik oqaloqatigineqarpoq, ilaatigut e-maileqarneq immersugassallu kattuffimmi atorneqartut pillugit.
Narsami peqatigiiffeqarnerup ingerlalluaqqilernissaa maanna isumalluarnartinneqarpoq. Peqatigiiffiup siulittaasortaava maanna kattuffimmut attaveqallattaavoq isumagisassat assigiinngitsut ingerlanneqaleqqinnissaat pillugu, soorlu peqatigiiffiup allaffiata ammasarfiinut sulisullu sinniisaannik ataatsimeeqateqartarnermut tunngasutigut.
Sammineqarajuttut
Siunertaavoq kattuffiup angalatitsinera tamanna aappaagu nanginneqassasoq, peqatigiiffiit sinneri tamaasa tikinniarneqassallutik.
Illoqarfinnut nunaqarfinnullu qulingiluanut mannamut angalasimanerit aalajangersimasunik pisassaqarfiullutillu imaqartinneqarput: Peqatigiiffiit siulersuisuinik pikkorissaanerit, sulisut sinniisuinik peqatigiffiillu siulersuisuinik ataatsimeeqatigiissitsinerit, suliffeqarfinnut pulaarnerit, innuttaasunik ataatsimiititsinerit kiisalu pisiniarfinni issiasarluni paasisitsiniaanerit ilaasortassarsiornerillu.
Inuit oqaloqatigisat makkuninnga sammisaqarajupput SIK-mit tikeraat maluginiagaat naapertorlugit:
- Napparsimanersiutinut assigisaannullu tunngasut.
- Nalliuttuni akissaasersorneqartarnerit.
- Qaangiuttoornersiaqarnermut taarsiullugu sulinngikkallartitaasarneq.
- Soraarnerussutisiassaqarfimmut SISA-mut tunngatillugu paatsuunganartitat, ornigulluni paasititsiniaasoqarnissaanik pisariaqartitsinermut angisuumut takussutissaasut.
- SIK-p isumaginninnermut aningaasaateqarfiisa periarfissiissutaannut tunngasut ilisimanngisat.
- Isumaqatigiissutinut tunngasut assigiinngitsorpassuit taputartuullugit oqaluuserineqartartut.
Suliffigisami aqutsisunut tunngasut, sulerulunnerit, tamatumanilu akilernerlunneqartarnerit nal. ak. 80-it qaangeqqusaannginnerinut tunngasut.
Siunnersorti Inge-Marie Rosing ima inerniliivoq: „Paasissutissat takivallaanngitsut ersarissut ilaasortatsinnit annertuumik pisariaqartinneqarput Facebookikkut nittartakkatsigullu, immaqalu aamma TV-mi ussassaarutitigut. Immaqalu SIK-mut ilaasortanut sammisitamik mobilikkut app-eqalersinnaaneq pisariaqartinneqarpoq.“
Ittoqqortoormiini innuttaasunik ataatsimiititsineq. Tikeraarnerup nalaani 46-t ilaasortanngorput nutaat.
Saamiup tungaani: Puisi Ittoqqortoormiit eqqaanni napittortaq Inge-Mariep mamartorsuuneragaa.
Sisimiumi katersortarfimmi innuttaasunik ataatsimiititsinermi sammineqarnerupput ilaasortaanermut akiliutip pisariunera aamma isumaginninnermut aningaasaateqarfiit qujamasunnarnerat.
Nanortalimmi katersortarfimmi innuttaasunik ataatsimiititsineq 30-t missaannit peqataaffigineqartoq uummaarissumik oqalliffiuvoq.
Narsami tikeraarnerup nalaani sulisartut peqatigiiffiat immikkut ittumik ataatsimeersuarpoq. Otto Davidsen siulittaasunngorpoq. Asseq una siulersuisunngortut naapeqqaarnerisa ilaannit pisuuvoq.
Ittoqqortoormiit maajip naalernerani SIK-mit tikeraarneqarput.