Minnerit ilaat annerpaallu tullia, tamarmik immikkut pitsaasumik nersualaagassaasumillu takutitsisut. Tassa eqqarsaatit naatsumik oqaatigalugit taakkuupput SIK-p siulersuisuuneri 2022-mi ”Peqatigiiffitsialak”-mik toqqaanialermata. Toqqarneqartullu tassaapput Nanortalimmi Ilulissanilu sulisartut peqatigiiffii.
Nanortalimmi sulisartut peqatigiiffiat, nunatsinni kujallersaasoq, 132-nik ilaasortaqarluni peqatigiiffiit SIK-mut atasut 20-t akornanni minnernut ilaavoq.
Otto Lundblad siulittaasoralugu Nanortalimmi peqatigiiffik aalajaatsumik siuariartarluni ingerlavoq Nanortalimmi eqqaanilu sulisartut peqatigiiffeqarneranni katersuuffiulluni – qitiusumik kattuffik suleqatigilluarlugu.
Ilulissani sulisartut peqatigiiffiata ilaasortaqassutsimigut upernaaq 700-t qaqivai, eqeersimaartumik suliniuteqartarnermut takussutissaalluartumik.
Else Jonna Villadsen siulittaasoralugu suliniutit assigiinngitsut pitsaasumik ataqatigiissaarneqartarput, sulisullu sinniisaat takussaasumik suliniaqataapput inuit sulisartut peqatigiiffeqarneranni peqataalersinniarlugit – tassami ”ataatsimoorutta nukittunerussagatta”.
”Peqatigiffitsialak”-mik toqqaaneq SIK-p iluani ukiumoortumik kajumissaatitut ingerlanneqartarpoq. Ilaasortaqarnikkut ineriartorluarnerup saniatigut tamatumani maluginiarneqartarput Ilaasortanik sullissilluarneq sammisassaqartitsilluartarnerlu. Aamma suliffeqarfinnut attaveqarluarniarneq, kattuffimmik suleqateqarluarneq minnerunngitsumillu sulisut sinniisoqarnerannik aallussilluarneq maluginiarneqartarput.
Sulisartut peqatigiiffeqarneranni sulineq pikkunartumik noqqoruuffiusinnaasarpoq. Tamanna Nanortalimmi sulisartut peqatigiiffiata paasilluarsimavaa. Una siorna Nanortalimmi maajip aallaqqaataasiorluni aliikkutariinnermi assilisaavoq.
Ilulissani sulisartut peqatigiiffiannik ingerlatsisut Brugsenip paarliani sassaqqasut – periaaseq peqatigiiffiup ukiuni kingullerni siunertamut ajunngitsumut atorlualigaa. Assimiittut: Elias Brandt, Else Jonna Villadsen aamma Mette Marie Møller Lennert.