Sulisut sinniisaannik pikkorissaanerit ukioq mannamit nutaamik aaqqissuunneqarput “Tunngaviusumik pikkorissarnernut” aamma “Assigiinnik sulialinnut pikkorissarnernut”.
SIK-p isumaqatigiissutai malillugit sulisuusut sinniisaat qilanaarutissaqarput pikkorissarnernik nutaanik ilusiligaasunik imarisamikkullu aaqqissuussiffigeqqinneqarsimasunik.
Soorlumi pikkorissarnissanut pilersaarutini nutaani takuneqarsinnaasoq Tunngaviusumik pikkorissarneq ullunik tallimanik sivisussuseqartoq maanna marsimi aallartissutigineqassaaq.
Pikkorissarneq taanna sulisut sinniisaannut nutaanut suliffeqarfinnit assigiinngitsuneersunut naatsorsuussaavoq. Pikkorissarnerillu taamaattut tallimat ukioq manna pilersaarutaapput.
Taava septembarimi Assigiinnik sulialinnut pikkorissarneq siulleq ingerlanneqassaaq, ulluni sisamani pisussaq, ukiorlu naatinnagu suli marloriarluni ingerlanneqaqqittussaq. Taannalu naatsorsuussaavoq sulisut sinniisaannut branchemi aalajangersimasumi atorfeqartunut, tunngaviusumillu pikkorissareersimasunut.
Pikkorissarnerit SIK-p Qaammarsaanermut Ilinniartitaanermullu Aningaasaateqarfianit (QIA)ingerlanneqartartut ilusiligaanerat ukiorpaalunni atuuttoq taamaalilluni atorunnaarpoq.
Pikkorissarnerit Imm. 1 aamma Imm. 2-mik taallugit ingerlanneqarsimapput, aallartiffiusut ingerlaqqiffiusullu, assigiinngisitaartunik suliffillit ataatsimoortittarlugit. Ukiunili kingullerni kissaatiginartinneqalersimavoq pikkorissartut suliamikkut assigiiaarnerunissaat, taamalu sunniivigeqatigiinnissaminnut periarfissarissaarnerunissaat. Kissaatigisaq tamanna akuersaarlugu pikkorissarnerit assigiinnik suliaqarnermik assigiinnillu isumaqatigiissuteqarnermik tunngaveqartinnerullugit aaqqissugaalerput.
Tamatumani soorunami siunertaavoq sulisut sinniisaasa ulluinnarni atuunnerminni nukittorsagaanissaat. QIA-p siulersuisuisa ataatsimiinnerannut tunngavissatut allakkiami allassimavoq pikkorissarnerit aaqqissuussaanerat taamatut allanngortiinnarlugu sulisut sinniisaasa sulinerat imaaliallaannaq nukittorsagaanaviarunanngikkaluartoq. Maannali allanngortitsinerup makkunatigut iluaqutaanissaa naatsorsuutigineqarpoq:
- Inuttut ineriartornerup, aporaannernik iluaqutinngortitsinerup saqqummeeriaatsillu (attaveqaqatigiinnerup) pingaartinneqarnerulernerisigut sulisut sinniisaasa suliaminni nukittunerulernissaat anguneqarsinnaassaaq.
- Isumaqatigiissutinik paasinninnerulerneq anguneqarsinnaavoq peqataasut tamarmik isumaqatigiissutit taakkuusut tunngavigalugit sulippata.
Pikkorissarnerit pilersaarutigineqartut saniatigut sulisut sinniisaasa suliffeqarfimmit ataatsimit pisut isumasioqatigiissinneqarnissaat pilersaarutaavoq.