Isumakulunnartumik inuusuttut suliffissaqanngitsut amerlasoorujussuupput. Inuusuttut amerlavallaartut ilinniagaqanngillat aamma inuusuttut amerlasuut ilinniarnerminnik naammassinnissinnaanngillat praktikkerfissat amigaataanerannik pissuteqartumik.
Taamaattumik SIK, NUSUKA aamma GE inassuteqaateqarput politikkikkut iliuuseqartoqarnissaanik kikkunnut tamanut praktikkerfissat qulakkeerniarlugit. Tamatumunnga ilutigitillugu inuusuttunut inassuteqaatigineqarpoq praktikkerfissaqarnissamut aamma ilinniagaqarnissamut pisinnaatitaaffimminnik piumasaqaateqaqqullugit.
Inuusuttortavut katataatissanngilavut taamaattumillu maannakkut politikikkut iliuuseqartoqarnissaa piumasaqaatigaarput.
Naalakkersuisut siulittaasuat, Kim Kielsen, Inatsisartut Ukiakkut Ataatsimiinneranni ammaanermini oqalugiaatsimini oqaaseqarpoq, tassa ”Inuusuttut akornanni suliffissaaleqinerup annikillingaatsiarnissaa Naalakkersuisut suliniutigaat. Inuusuttut ilinniagaqarnerminni unittuussanngillat suliffissaaleqileratillu, kisianni siunnersorneqarlutillu tapersersorneqassapput.”
SIK, NUSUKA aamma GE tamatumunnga isumaqataapput, kisianni taamanili oqaasiinnaavoq susoqarnanilu. Maannakkut iliuuseqarnissaq piffissanngorpoq!
Taamaattumik piviusorsiortumik kissaatigaarput:
- Tassa nunami maani suliffeqarfinni tamani praktikkerfissat amerlanerusut qulakkeerneqarnissaat – suliffeqarfinni privatini taamatuttaaq pisortat suliffeqarfiutaanni – kiisalu tamatumunnga ilutigitillugu Namminersorlutik Oqartussat aamma kommunit immikkut iliuuseqassasut qulakkeerniarlugu manna, inuusuttut meeqqat atuarfianni atuartooreernermik kingornatigut inuussutissarsiutitigut ilinniakkamik naammassinninnissaat.
- Tassa sanaartornermik suliaqartunut (entreprenørinut) avataaneersunut tamanut, Kalaallit Nunaanni suliassanut aamma suliniutinut neqerooruteqartunut, piviusumik piumasaqaatigineqassasoq aammattaaq taakku inuiaqatigiinnut tapertaanissamut pisussaaffeqartut kiisalu sulisunik ilinniartitsinissamut.
- Tassa Sanaartornermut Iluarsaassisarnermullu aningaasaateqarfimmit ingerlatsinerit pitsaanerusumik ingerlanneqalissasut, taamaaliornikkut illuliortiterneq aamma sanaartorneq aalaakkaanerusumik ingerlanneqalerluni immikkoortunut aamma nunami sumiiffinnut agguaqatigiissillugu, taamaalillutik suliffeqarfiit lærlinginik ilinniartitsinissaminnut sapiinnerulissammata.
- Tassa pisortat suliffeqarfiinik sullissinissamut isumaqatigiissuteqarnerni sillimaffigineqartassasoq ilinniarfinnik/praktikkerfissanik pilersitsisoqarnissaa, kiisalu periarfissiisoqassasoq ilinniartitaanernut sammiviit nutaat suliaqarfinnut ilanngunneqarnissaannik.
- Tassa internet aqqutigalugu suliffissarsiortarfiup (jobportal) lærlinginut aamma praktikertunut sulisitsisunik pissarsinissamut aammalu illuatungaanut atugaallualernissaa qulakkiissallugu
- Namminersorlutik Oqartussat allaffeqarfissuani praktikkerfissat marloriaat sinnerlugu amerlineqassasut.
Praktikkerfissat amerlanerusut aamma siunissamut iliuusissat nutaat pisariaqartinneqarput
Inuusuttut suliffissaaleqisut immikkut ittumik iliuuseqarfiginiarlugit aningaasanut inatsimmi 24,9 mio. koruuniupput aamma Piareersarfinnut aningaasaliissutit qaffanneqarput, taamaattumik naatsorsuutigineqartariaqarpoq ukiuni aggersuni praktikkerfissanik amerlanerusunik ujartuisoqalernissaat.
Uagut inuusuttunut inassuteqaatiginiarparput praktikkerfissaqarnissaminnut pisinnaatitaaffitsit piumasaqaatigissagaat, kisianni aammattaaq taakku ilinniakkamik naammassisaqarnissamut pisussaaffitik naammassissagaat. Tamatumunnga ilutigitillugu SIK-p, NUSUKA-p aamma GA-p inassuteqaatigaat ataatsimoorluni siunissamut iliuusissatut pilersaarusiortoqarnissaa, tassani pineqarluni 2020-p tungaanut praktikkerfissat qanoq amerlatigisut pilersinneqarnissaat.
SIK, NUSUKA, GE