Neqinik eqqussinermi akitsuutit atorunnaarsinneqarnissaat nioqqutissat ulluinnarni pisariaqartut akitsoraluttuinnarneranni iluaqutissiissutissat pisariaqartut ilagaat. Demokraatillu siunnersuutaat tamanna Naalakkersuisooqatigiit aningaasat naleerukkaluttuinnarnerannut akiuussutissatut iliuuseriniagaannut ilanngunneqaruni pissusissamisuuginnartussaavoq.
Soorlumi SIK-p Inuusuttaasa siulittaasuata ilinniagaqarnersiutit naleerukkaluttuinnarnerat pillugu qanittukkut oqaaseqaammini oqaatigigaa, aningaasaqarnikkut assoroornartorujussuanngulerpoq – ilinniartunuinnaanngitsorli, aammali sulinermik inuussutissarsiuteqartorpassuarnut.
”Ullumi puussiaq ulikkaarlugu pisiniarama qaammammusiannguakka kakkaammi ilanngarujussuarput,” illumi ningioq ippassigami tupassimalluni taama oqarnerarneqarpoq.
Taama oqarneq ullunut atulikkatsinnut tunngatillugu paasissutissaalluartorujussuuvoq. Tamannalu aamma immini naalakkersuinikkut oqartussaasunut kalerrisaarutaavoq imaattumik: Inuiaqatigiinni aningaasaqarnikkut sanngiinnerit eqqarsaatigalugit iliuuseqarnissaq nukinginnarpoq.
Putin unammillersinnaanngilarput. Kisianni Putinip Ukrainemi sorsunnerata sunniutipilui innuttaasunut sapinngisamik oqilisarniarsinnaavavut inuiaqatigiinni nammaqatigiinnissamik isuma tunngavigalugu ulluni oqimaatsorsiorfiusuni iliuuseqartarnitsigut.
Neqinik eqqussinermi akitsuutit atorunnaarsinneqarnissaat immini tamakkiisumik matussutissiisinnaanngilaq, allanilli assingusunik iliuuseqarnernut ilagitikkaanni pinngitsoornani iluaqutaasussaavoq ilaqutariinni ulluinnarni aningaasartuutit naammattusaarniarneranni. Iliuuserlu taamaattoq sulinermik inuussutissarsiutillit SIK-mut ilaasortaasut akornanni qujarunneqarluartussaavoq.
Jess G. Berthelsen
SIK-p siulittaasua