”Qujanarsuaq. Qalipaaffissiat 100-t qalipaatillu 100-t pissarsiarivavut.” SIK-p isumaginninnermut aningaasaateqarfiini siunnersortimut Dorthea Josefsenimut e-mailerluni taama allattoq tassaavoq immikkoortortaqarfimmi napparsimasunik paarsisut pisortaat Girard Paul Dupitas.
Tassami Dronning Ingridip Napparsimmavissuani Nuummiittumi napparsimasut akunnittarfiannit Patienthotelimit SIK ilisimatinneqarsimavoq meeqqat misissorneqarnissaminnut tassani utaqqisut sammisassaqartinneqarnerat amigaateqartoq.
E-mailikkut allaffigeqattaannermi apeqqutigineqarpoq SIK-p isumaginninnermut aningaasaateqarfii qalipaanermut atortunik tunissuteqarsinnaanersut.
Taamaariarmat SIK 5.000 kr.-inik aningaasaliivoq atortussanik kissaatigineqartunik pisiniutissanik. Taamalu pitsaasumik ineriartornartumillu sammisaqartitsinissamut atortussat naammattut – naammakkallartut – meeqqanut immikkoortortaqarfimmi pigineqalerput.
”Tamanna meeqqat maaniittut ila nuannarissaqaat,” napparsimasunik paarsisoq e-mailikkut qujassuteqarluni aamma taama oqarpoq.
Aamma tunissuteqartunit, tassa SIK-p isumaginninnermut aningaasaateqarfiinit, Patienthotelip suliniarneranut taamatut tapiissuteqarnissamut periarfissaqarneq nuannaarutigineqarpoq.
Isumaginninnermulli aningaasaateqarfiit suliaat pingaarneq tassaavoq peruluutaasumik napparsimasut ilaquttaminnit ingiaqatigineqarnissaannut tapiissuteqartarneq, tamatumunnga tunngatillugu akissarsiatigut annaasanut matussutissiisarneq kiisalu isaruartaarniartunut tapiissuteqartarneq.
► Una tooruk isumaginninninnermut aningaasaateqarfiit sulinerat pillugu paasisaqarnerujumallutit