Qassimiuaarneq inuiaqatigiinni kattuffiit politikkikkullu suleqatigiiffiit assigiinngitsut sinniisuinit peqataaffigineqarpoq.
Nunatsinni sulisartut kattuffeqarnerata ukioq manna juulip aallaqqaataani ukiuminik 60-innguinera malunnartinniarlugu SIK qassimiuaartitsivoq oqalliffiusumik maanna siunissamilu inuiaqatigiinni pissutsit pillugit. Tamanna pivoq ulluni 28.-30. juuni Nuummi ilaatigut silami ilaatigullu illorsuarmi timersortarfimmi.
Qassimiuaarnermik isumassarsiaq pillugu SIK-p siulittaasua Jess G. Berthelsen ilaatigut ima oqarpoq: “Isumaqarpugut inuit naapittarnerat tunngaviulluinnartuusoq, aammalu isumaqarluta inuuneq sorpassuartigut tassaasoq naapitavut peqatigalugit pilersirseqataaffissarput. Taamaattumik ataatsimoorneq nukittorsarniarlugu aaqqissuussivugut, kikkulluunniit naapiffigisinnaasaannik. Isumaqaratta oqaloqatigiinneq oqallinnerlu tassaasut tamatta siunissatsinnik nukittorsaaqataasussat.”
