Qangaaniilli SIK-p Royal Greenlandillu ullut ajunngippata ajorpataluunniit suleqatigiilluarniartarsimanerat naluneqanngilaq. Tassami SIK-p ilaasortaasa ilaqutaasalu Royal Greenlandimi suliffissat pisariaqartippaat, Royal Greenlandillu SIK-p ilaasortaasa sulisinnaassusiat pisariaqartippaa.
Taamaattumik pissusissamisoorpoq Royal Greenlandip SIK-llu suleqatigiinneratigut upernaaq manna 2023-mi sulisut sinniisaat illoqarfinni nunaqarfinnilu 12-ini aalisakkanik tunisassiorfinnit pisut katersorlugit isumasioqatigiiffiusumittaaq pikkorissartinneqarmata.
Sulisut sinniisaat 19-it peqataapput. Tamanna pivoq Sisimiuni. Assilisallu quppernermi maani takuneqarsinnaasut ulluni pingasuni pikkorissarnermi assilisaapput.
SIK-p Qaammarsaanermut Ilinniartitaanermullu Aningaasaateqarfiata pikkorissartitsisarneri nalinginnaasut imarisamikkut sulisut sinniisaasa pisariaqartitaannik tunngaviusunik matussutissiilluartarput. Kissaatigineqarsimavorli tapertaasumik pikkorissartitsisoqassasoq aalisakkerivinni pissutsit immikkut ittut aallaavigalugit aaqqissuussamik. Tamannalu naammassineqarpoq ulluni 23.-25. maaji 2023.
Pikkorissarnerup tamatuma pitsaaqutigaa peqataasut tamarmik suliffeqarfimmit ataasiusumit aggersuunerat taamalu pissusiusunik ilisimasaqaqatigiinnerat. Taamaariarmallu oqallittoqarluarsimasoq ilisimasanillu avitseqatigiilluartoqarsimasoq nalunaarutigineqarpoq.
Royal Greenlandip tunisassiorfiini sulisut sinniisaat peqataasut ukunannga aggersuupput:
Upernavik
Upernavik Kujalleq
llulissat
Qeqertaq
Uummannaq
Ikerasak
Qasigiannguit
Kangaatsiaq
Niaqornaarsuk
Sisimiut
Maniitsoq
Kangaamiut
