Soorlu SIK-p nittartagaani quppernermi ”Isumaqatigiissutit”-ni takuneqarsinnaalersoq, Royal Greenlandimik isumaqatigiissut 1. januaari 2023-mit ukiuni pingasuni atuuttussamik nutarterneqaqqammerpoq.
Isumaqatigiissut nutaaq pitsanngoriaaterpaalunnik imaqarpoq pingaartumik makkununnga tunngasunik: Tunngaviusumik akissarsiat, soraarnerussutisiassanut katersat, isumaginninnermut aningaasaateqarfimmut feriefondimullu katersat, napparsimanersiutit, piffissani nikingasuni paarlakaallunilu sulinermut tapisiat, immikkut ittumik sulinngiffeqarsinnaanerit kiisalu naartunermi akissarsiaqarsinnaaneq.
Royal Greenlandimik isumaqatigiinniarnermi angusat ilaatigut makkuupput:
Ilinniarsimanngitsut ilinniarsimasullu 18-inik ukioqalersimasut nalunaaquttap-akunneranut tunngaviusumik akissarsiaat qaffattassapput 1. januaari 2023-mi 4,60 kr.-inik, 1. januaari 2024-mi aamma 4,60 kr.-inik kiisalu 1. januaari 2025-mi 4,10 kr.-inik.
Isumaqatigiissummi maannamut atuuttumi imaattumik aalajangersagaqarpoq: Sulisup ilaqutaasa qanigisat ilaat perululluni napparsimappat toquppalluunniit sulisoq sivikinnerpaamik ukiumik ataatsimik ataannartumik atorfeqareeruni akiliunneqarluni ilaquttap napparsimasup toqusulluunniit Kalaallit Nunaanni Danmarkimiluunniit najugaanut akiliunneqarluni angalasinnaatitaavoq. Tamanna isumaqatigiissummi nutaami ima ilassuserneqarpoq: Sulisulli ukioq ataaseq inorlugu atorfeqartut Isumaginninnermut Aningaasaateqarfimmut aningaasartuutinut akilliunneqarnissamik qinnuteqarsinnaapput.
Akissarsiat pigiinnarlugit naartunermi erninermilu sulinngiffeqarallarsinnaaneq isumaqatigiissummi nutaami naqissuserneqarpoq.
Inatsisini tamatumunnga tunngatillugu pisinnaatitaaffiit isumaqatigiissummi maanna atuuttumi innersuussutigiinnarneqaraluarput. Isumaqatigiissummili nutaami allassimalerpoq ‘sulisoq akissarsiani pigiinnarlugit naartunermi, ernereernermi qitornavissiartaarnermilu Inatsisartut inatsisaat qaqugukkulluunniit atuuttoq naapertorlugu.’