SIK ”2020-mi Sulisunut Sinniisutsialak”-nik sisamanik toqqaavoq

Siunnersuutit sinerissamit takkussortut tunngavigalugit sulisut sinniisaasa 323-usut ilaat sisamat 2020-mi ”Sulisunut Sinniisutsialaattut” toqqarneqarput.

Sulisut sinniisaasa suliffinni assigiinngitsuni pingaaruteqassusiat malunnartikkumallugu SIK-p siulersuisuunerisa nunatsinni tamarmi SIK-p isumaqatigiissutai tunngavigalugit su­lisuusut sinniisaat qinikkat 323-usut ilaat sisamat ukioq manna ”Sulisunut Sinniisutsia­lat­tut” toqqarpaat.

Ukiaq manna oktobarimili SIK taamatut toqqagassanik siunnersuu­te­qaqqusilluni allagarsii­sa­qattaarpoq. Toqqaanissami makku pingaartitassatut nalunaarutigineqarput:

  1. Sulisut sinniisaattut sulilluartoq, sulisut sulisitsisullu akornanni suleqatigiillu­ar­nis­­sa­mik pingaartitsisoq,
  2. SIK-mi ilaasortaanerup iluaqutissartai pillugit suliniuteqarluartoq aammalu,
  3. Suliffimmi suleqatit isumaqatigiissutit tunngavigalugit pisinnaatitaaffiisa il. il. suliffeqarfimmi ataqqineqarnissaannik suliniuteqarluartartoq.

Siunnersuutit sinerissamit takkussortut tunngavigalugit siulersuisuunerit aalajangerput uku 2020-mi ”Sulisunut Sinniisutsialaattut” toqqarneqassasut:

Sakarine Larsen, Niaqornaarsuk
Sakarine Larsen assigiinngitsunit pingasunit inassutigineqarsimavoq. Inassutigine­qarnera ima naalisarneqarsinnaavoq: Paasititsiniaanermik oqaloqateqartarnermillu annertuumik suliniuteqartarpoq. Sulisut sinniisaattut nunaqarfimmini suliffeqarfinnit assigiinngitsuniit suliassat aalaniuttarpai naammassineqarnissaannullu sulissuteqartarluni. Nammineq piumaffigineqanngikkaluarluni suliffeqarfinnut ataasiakkaanut pulaartarpoq pisariaqarfiatigullu ikiuuttarluni.

Karen Thorleifsen, Aasiaat
Karen Fritids- og Ungdomsklubbi Igdlo-miit aammalu Juniorklubbi Nuannersumiit sulisunit tamanit innersuunneqarsimavoq. Inassuteqarnermi erseqqissarne­qar­poq sulisut sinniisaattut sulinermini pingaartitarigaa suliffimmi pissuserissaarluni­lu ileq­qorissaarnissaq, nammineerlunilu suleqatiminut tamanna sallersaaffigalugu mali­gassiuisuulluni. Isumaqatigiissutinut tunngassuteqartut eqqummaariffigai sulisullu sinniisaattut sulinermini  suleqatiminut tunniusimalluinnartuulluni.

Lars Eskildsen, Upernavik
Lars Eskildsen pillugu inassutigineqartuni sisamaasuni oqaatigineqarpoq Larsip ilisa­r­naatigilluinnaraa eqqissisimalluinnarluni nuimaniartuunanilu sulisut sinniisaattut suliassani nukittuumik ataqqineqaatigisaminillu suliarisarai. Suliffeqarfinnut assigiin­ngit­sunut suliffimmi atukkat pillugit tusarniaasarpoq oqaatigiuartarlugulu aqutsisut sulisullu akornanni suleqatigiilluarnissaq pingaartuusoq. SIK-mi ilaasortaanerup ajun­ngitsortai pillugit siammarteralunilu pilerisaarisarpoq.

Jensine Poulsen, Maniitsoq
Jensine pillugu eqqaaneqarpoq peqqissaarussilluni, piviusorsiorluni akisussaassuse­-q­ar­lunilu sulisut sinniisaattut sulinini ingerlakkusuttaraa. Tunniusimasuuvoq suliassarlu tigugaangamiuk sulissutigipallattarpaa. Ataatsimeeqateqarsimanerup kingor­nagut paasissutissanik tunioraasuuvoq. Tunniusimasuullunilu ikiuukkumatunini pillugit iluarisimaarneqartarpoq pisunilu assigiinngitsuni ajornartorsiutit aaqqiiffigine­qarnissaat pillugit peqataatinneqartuartarluni.

Sulisut sinniisaat toqqarneqartut taakku sisamat allagartamik tamatumunnga uppernar­saammik 3.000 kr.-inillu (akileeraarutit peereerlugit) kaasarfimmiussinneqassallutik.

Taamaalilluni ukiumi qaangiutilersumi SIK-p sulisut sinniisoqarnerannik arlalitsigut malunnartitsiniarnera naggaserneqarallarpoq.

Ukiup aallartinnerani saqqummersinneqarpoq atuagassiaaraq SIK-p siulittaasuata Jess G. Berthelsenip sulisut sinniisaannut nutaanut atuutereersunullu allagaatut ilusiligaq, siunnersuutinik kaammattuutinillu imalik.

Tamatuma kingorna saqqummersinneqarpoq filmeeraq qulequtaqartoq ”Sulisunut sinnii­suuneq”. Tassani SIK-p siulittaasuata tullia Ludvig Larsen sulisullu sinniisaat arlallit kiisalu sulisitsisut ilaat oqaaseqartinneqarput.

Filmimi oqariartuutigineqartut pingaartut ilagaat misilittakkat naapertorlugit sulisut sinnii­soqaraangata suliffimmi suleqatigiilluartoqarnerusartoq.

Taasariaqarportaaq SIK-p Qaammarsaanermut Ilinniartitaanermullu Aningaasaateqarfiata (isumaqatigiissutit naapertorlugit sulisitsisut aningaasaaleeqataaffigisartagaata) aningaa­salersugaanik ukiut tamaasa ataavartumik sulisut sinniisaat pikkorissarneqartarmata.