SIK 23-ssaanik ataatsimeersualerpoq

Sulinermik Inuussutissarsiuteqartut Kattuffiat (SIK) ileqquusumik ataatsimeersuarniarpoq ulluni 2. aamma 3. septembari 2021 Hotel Arctic-imi, Ilulissani. Taamaalilluni sulisartut kattuffiat ukiuni atuuffimmini 65-ini 23-ssaanik ataatsimeersuassaaq (Grønlands Arbejder Sammenslutning, GAS, kingorna SIK-nngortoq, juulimi 1956-imi pilersinneqarami).

Kattuffiup immikkoortortaqarfiisa 20-usut aallartitaasa Ilulissaniinnissat iluatsillugu sapaatip-akunnerata ataatsimeersuarfiusussap annersaa pisussanik pilersaaruteqarfiuvoq. Tassami sisamanngornermi tallimanngornermilu ataatsimeersuarnissaq sioqqullugu pikkorissarnerit isumasioqatigiinnerillu ingerlanneqartussaapput.

Ataatsimeersuarnermi qulequtaassaaq ”Ataatsimoorutta nukittunerussaagut!”. Taamaalilluni isumasioqatigiinnerni sulisartut kattuffiata kattuffittut suli qanoq nukittorsaqqinneqarsinnaanera sammineqassaaq. Tamatumani ilaatigut pineqarput kattuffiup ingerlatsiviisa assigiinngitsut suleqatigiinnerat aammalu sulisut sinniisoqarneranni pitsanngorsaanissamut periarfissat.

Ataatsimeersuarnerup ullua siulleq, sisamanngorneq 2. septembari, pisarnertut katinngatilisaarluni ingerlaaqatigiinnermik naalagiarnermillu aallarnerneqassaaq. Ingerlaaqatigiinneq nal. 8.40 aallartissaaq ”World of Greenland”-ip (Kalaalimineerniarfiup akia’tungaaniittup) eqqaanit. Aqqusinikkut qummut Pisiffik saneqqullugu ingerlaaqatigiinneqassaaq Naalakkatta Illuata Mathias Storchip Aqqutaaniittup tungaanut, tassani naalagiartoqassalluni. 

Ataatsimeersuarnissami ullormut oqaluuserisassat ilagaat siulersuisuunerit nalunaarutaat aamma ataatsimeersuarnerup kingulliup 2017-imi pisup kingorna ukiuni sisamani aningaasaqarnerup qanoq ingerlasimanera. Taava aamma malittarisassat malillugit siulittaasussamik siulersuisuunernilu ilaasortassanik qinersineq oqaluuserisassanut ilaapput.

Atuakkamik saqqummersitsinissaq ataatsimeersuarnissaq sioqqullugu ullormi kingullermi ualikkut aamma pilersaarutaavoq. Atuagaq SIK-p oqaluttuarisaaneranut tunngassuteqarniarpoq.

SIK aalajangersimavoq coronamut akiuussutissamik tamakkiisumik kapitissimasut kisimik ataatsimeersuarnermut peqataasinnaassasut. Taama piumasaqarnikkut sapinngisamik isumannaatsumik toqqissisimanartumillu pinissaq siunertaavoq.