Sulinermik Inuussutissarsiuteqartut Kattuffiat ataatsimeersuassaaq ulluni 25.-26. oktobari 2017, Ilulissani Hotel Arctic-imi.
Oqaluuserisassat SIP-ni (SIK-p immikkoortortaqarfiini) tamani tiguneqareersimalerput ataatsimeersuarnissaq qaammammik ataatsimik sioqqullugu.
Ataatsimeersuarnissami ullormut oqaluuserisassat tunngaviusutigut pingaaruteqartut arlaliupput oqaluuserineqarlutillu aalajangiivigineqartussat. Soorlu ilaasortat akiliutaasa nunami tamarmi assigiilernissaat siunnersuutaavoq.
Aamma kattuffiup malittarisassaanut SIP-llu nalinginnaasumik malittarisassaannut iluarsiissutissanik siulersuisuunerit siunnersuutaat saqqummiunneqassapput. Ataatsimeersuarnermullu aallartitat siulersuisunik nutaanik qinersissapput.
Ataatsimeersuarnissap pinngitsiarnerani ataatsimeersuarfiusumi pisussat arlaqaalupputtaaq. Soorlu ataatsimeersuarnermut aallartitat pikkorissartussaapput, Aamma nunani avannarlerni sulisartut kattuffiisa suleqatigiiffianni NFS-imi allattaaneq Magnus Gissler nassuiaateqarniarpoq.
Sulinermik Inuussutissarsiuteqartut Kattuffiat aaqqissuussaavoq uku qiteralugit: Ataatsimeersuarneq (ukiut sisamakkaarlugit), Nakkutilliisoqarfik (ataatsimeersuarnerit akornanni ataatsimiittartoq), Siulersuisuunerit, Ulluinnarni aqutsisut, Immikkoortortaqarfiit, SIK-p Inuusuttai aamma Klubbit.
Kattuffiup siulittaasua Jess G. Berthelsen ataatsimeersuarnissaq pillugu erseqqinnerusumik oqaaseqartinneqarsinnaavoq
Peqataasussat aamma ullormut oqaluuserisassat
- Ataatsimeersuarnermi pisussat allattorsimaffiat
- Ataatsimeersuarnermut aallartitat allattorsimaffiat – una tooruk
- Ullormut oqaluuserisassat – una tooruk