SIK-p siulittaasuata tullia SIK-milu siunnersortit ilaat Kujataanut angalaqqammerput nuannersumik ataatsimeeqateqartarlutik suliffeqarfinnilu oqaloqateqartarlutik. Angalanerminnit nalunaarusiaat maani atuaruk.
Siulersuisuunerit aalajangigaannik siulittaasup tullia Ludvig Larsen kiisalu SIK-mi Qaammarsaanermut Ilinniartitaanermullu Aningaasaateqarfimmi siunnersortitut atorfilik Inge Marie Rosing ulluni 11. februaari – 19. februaari 2021 kujataani angalapput. Angalanermi tikinneqassallutik Nanortalik, Qaqortoq aammalu Narsaq. Silali peqqutaalluni ajoraluartumik Nanortalik anguneqanngitsoorluni.
Angalanermi siunertarineqarput immikkoortortaqarfiit siulersuisui tikillugit ataatsimeeqatigineqarnissaat ingerlatsinerannilu ilaatigut nukittorsarnissaat, suliffeqarfinnut pulaarluni paasititsiniaanissaq, innuttaasunillu ataatsimiisitsinissaq. Angalanerlu tamanna iluatsilluartutut oqaatigineqartariaqarpoq. Qaqortumi Narsamilu suliffeqarfippaaluit pulaarneqarput. Paasinarsivorlu SIK malillugu akissaasersorneqartut ilaasortallu minnerunngitsumillu aqutsisuisa pisariaqartilluinnaraat paasissallugu SIK sunaanersoq aammalu suut ilaasortaanermi iluaqusersuutaasinnaanersut.
Eqqartorneqartut annertuut ilagivaat sulisutut suut isumaqatigiissutit malillugit sulisoqarnersoq aammalu apeqqutit isumaqatigiissutit iluaniittut qanoq paasisariaanersut, ilaasortaaneq ilaasortaannginnerlu qanoq pineqartunut sunniuteqarsinnaanersut, feriefondimi periutsit suut atorneqartarnersut kiisalu annertuumik eqqartorneqartut ilagivaat Isumaginninnermut Aningaasaateqarfiup SIK malillugu akissaasersorneqartunut iluaqutissartai suunersut.
Angalanermi aamma siunertarineqarpoq sulisut sinniisaattut sulinerup nukittorsarnissaa sulisut sinnissaattullu sulisut amerlisarnissaat, tamannami suleqatigiinnermut aamma iluaqusersuutaassappat pisariaqaqimmat.
Narsami Neqi A/S-imi sulisut ataatsimeeqatigineqarput.
SIK-p siulittaasuata tullia Ludvig Larsen Narsami utoqqaat illuanni “Luuikasik”-mi sulisunik oqaloqateqartoq. Talerperliuvoq Narsami SIK-p immikkoortortaqarfiani siulittaasoq Mattaaraq Egede.
Angalanermissaaq aamma siunertarineqarpoq ilaasortatta suli amerlisarnissaat. Qaqortumiinnermi Narsamiinnermilu sulisut sinniisaannik nutaanik pissarsilluarpugut ilaasortarpaalussuarnillu aamma pissarsilluta. Paasissutissat eqqartorneqartut tamavimmik nittartakkatsinni takuneqarsinnaallutillu atuarneqarsinnaagaluartut paasinarsivoq sulisartorpassuit tikinneqarlutik paasissutissanik tuniorarneqarnissartik pisariaqartinnerugaat.
Tikitagut SIK malillugu akissaasersorneqartut, ilaasortat aqutsisullu kiisalu innuttaasut Qaqortumi Narsamilu inuppaalussuit najuuffigisaat tamarmik taamatut tikinneqarlutik qanimut SIK pillugu paasissutissanik tuniorarneqarnertik assorsuaq eqiiallaatiginerarpaat qujamasoqaallu paasissutissanik tuniorarneqarnertik pillugu.
Apeqqutit isumaqatigiissutinut, aningaasaateqarfinnut sulisut sinnissaattut sulinermut ilaasortaanermullu tunngassuteqartut qallorneqarput akissuteqarfigineqartarlutillu.
SIK-miit malugaarput SIK-mi ilaasortaanerup qangatut ataatsimoorfittut utertinneqarusunnera, atukkallu pillugit sulisartut ulluannik malunnartitsisarnerup suli ullumernit anneruleqqinnissaa kissaatigineqartoq, ataatsimooruttami suli nukittunerulertussaagatta.
Ukiup matuma ingerlanerani SIK-miit orninneqassapput Nanortalik qanittumi tikinneqanngitsoortoq, Sisimiut, Ittoqqortoormiit aamma Qaanaaq.