SIK-ginnaanngilaq ukioq manna ukiunik akunnaatsuliisoq. Aamma sulisartut kattuffiata allattoqarfiani siuttuusut tassani sulinerminni maanna 2026-p ukiaanerani akunnaatsu-liipput – Dorthe Stoiberg ukiuni 30-ni SIK-mi aningaaserisuusimalerpoq, Bjarne Petersenilu tassani inatsisilerituutut allattoqarfimmilu pisortatut ukiunik quliliilluni.
Dorthe Stoibergip ilisimaneqaatigaa kattuffimmi aningaasaqarnermik aqutsinermini peqqissaartuunini aalajaatsumillu pissuseqarnini. Kattuffiup siulittaasua Jess ataasialinngilaq Dorthe tassaanerarlugu ”kukik”, unami sipaggarissuullunilu aningaasanik atorluaaniartaqimmat, tamanut iluaqutaasussamik.
1996-imi aasagaa Sulisartut Højskolianni Qaqortumiittumi allaffimmi taamani pisortaasoq Bjørn Holm Dorthe Stoibergimut EVU-mi ilinniarsimasumut sianerpoq aperalugu højskolimi aningaaserisunngorusunnginnersoq. Dorthe pinasaarianngilaq, ukiorlu taanna septembarip aallaqqaataani atorfinippoq.
Højskoli piinnarnagu aamma SIK-mi aningaasaateqarfiit marluk Feriefondi aamma Qaammarsaanermut Ilinniartitaanermullu Aningaasaateqarfik tassani aningaaserissutilerpai. 2012-imilu SIK Isumaginninnermut Aningaasaateqarfeqalermat aamma taassuma aningaasaqarnera nakkutigilerpaa. Taava 1. januaari 2014 Nuummut nuuppoq SIK-p aningaasaqarneranut akisussaasutut sulilerluni, Sulisartut Højskolianni suliarisartakkani tamaasa nassarlugit. Tamannali sioqqullugu arlaleriarluni Nuummukartarsimavoq allattoqarfimmi naatsorsuuserinikkut pisariaqartitsisoqaraangat.
Bjarne Petersen inatsisilerituujuvoq 2016-imi 1. septembarimit SIK-mi sulilersimasoq, 2017-milu tassani allattoqarfimmi pisortaalersoq.
Kattuffiup peqatigiiffiillu akornanni suliassanik agguataareqqinnerup kingorna piffissami unamminiarnartulimmi ilaasortanik sullissinerup ineriartortinneqarnerani Bjarne pisortaavoq.
Sapaatip-akunnerata matuma siuliani allattoqarfimmi katerisimaalaarput Bjarnep ukiunik qulinnguinera malunnartinniarlugu, tassanilu oqaaserpaaluit aninneqarput Bjarnep suleqatitut allaffimmilu pisortatut qanoq ittuunera pillugu. Soorlu:
”Nunamut tunngasoq”. Uippallinngivilluni eqqissisimallunilu eqqarsaatigilluakkanik iliuuseqarniartartoq, ulloq ilungersunaraluallarpalluunniit saamasumik kiinnertarluni. Ulluni ulapaarfiusuniluunniit saaffigineqaraangami eqqissilluni torersumillu akissutissarsiniartartoq. Bjarnep ukiuni taakkunani sulinermini kivitsisinnaassuseqarnera aqutsisinnaanera, sulisunut, kattuffiup aningaasaqarneranut siulersuisuunernullu pitsaasumik inerneqartitsisarpoq.
Aamma: Taama sivisutigisumik ataannartumik kattuffiup allattoqarfiani pisortaqarneq qaqutigoortuuvoq …