
Eqikkaalluni paasissutissiineq: Sulinngiffeqarluni angalanermut aningaasaateqarfik kikkunnut atuunnersoq, qanoq akiliitigisinnaasoq qanorlu ingerlatsinersoq uani paasisaqarfigiuk.
Pisortani sulisitsisut kingullermik isumatiginiarneqarnerisa kingunerisaannik SIK-p Sulinngiffeqarluni Angalanernut Aningaasaateqarfiani (feriefondimik taaginnartakkatsinni) aaqqissuussinerit assigiinngitsut marlunngorput. Aaqqissuussineq siulleq tassa makitsinikkut angalanerit,1980-ikkut qiteqqunnerannili aningaasaateqarfiup neqeroorutigisaligai (1977-imi pilersinneqareerluni). Aaqqissuussinerup aappaa tassa ukioq allortarlugu akiliunneqarluni angalanerit, sulisoqatigiiaanut aalajangersimasunut 2024-mi agguaanneqartalersut.
Aningaasaateqarfik sulisitsisut SIK-p isumaqatigiissuteqarfigisimasaasa aningaasalersugaraat, aalajangersimasumik akiliuteqarfigisarlugu.
Taamaattumik aaqqissuussinerit marluusut arlaat atorlugu angalanissamik pissagaanni sulisitsisorisaq aningaasaateqarfimmut akiliuteqartartuusariaqarpoq. Angalanissamillu tunineqartut tassaagajupput ilaqutariit 18-it inorlugit ukiulinnik meerartaqartut.
Makitsinikkut angalanerit
Makitsinikkut angalanerit atuupput sulisunut assigiinngitsunut, sulisut ilinniagallit ilinniagaqanngitsullu nalunaaquttap-akunnermusiallit pillugit SIK-p isumaqatigiissutai naapertorlugit sulisuusunut.
Makitsinikkut angalanerit qinnuteqartunik makitsinikkut agguaanneqartarput – soorlu tamanna taaguutaata nalunaaraa. Juunip 15-ianit septembarip aallaqqaataata tungaanut qinnuteqartoqarsinnaasarpoq, tamatumalu kingorna ukiumi tulliuttumi angalanissanik makitsisoqartarpoq. 2025-mi ilaqutariit 330-t taamatut angalasussatut makitaasimapput.
Makitsinikkut angalanernut utaqqisut allattorsimaffiat
Makitaasimagaluartut ilaannik taamaatiinnartoqartaannarmat Feriefondi aalajangersimavoq utaqqisunik allattuisoqartalissasoq, taamaatiinnartoqaraangat makitaanngitsoorsimasut periarfissinneqarniassammata.
Allaaserisap matuma allanneqarnerani utaqqisut allattorsimaffianniittut tallimat taamatut angalanissanik pissarsisinneqareersimapput.
Ukioq allortarlugu akiliunneqarluni angalanerit
Aaqqissuussineq taanna aningaasaateqarfiup ingerlatsinerani nutaajuvoq. Sulisoqatigiiaat aalajangersimasut arlallit 2024-mi atuutilersumik ukioq allortarlugu akiliunneqarluni angalanissamut pisinnaatitaaffeqalerput.
Qanittukkullu teknikerit Namminersorlutik Oqartussat SIK-llu akornanni isumaqatigiissut naapertorlugu sulisuusut aaqqissuussinermut tassunga ilanngupput – allaat ukiut tamaasa angalanissamut akiliunneqarsinnaassallutik.
Taamaalillutik ukioq allortarlugu akiliunneqartartussatut sulisut uku allassimalerput:
– Niuernermi allaffinnilu sulisut
– Meeqqerisut isumaginninnermilu ikiortit
– Peqqinnissamut ikiortit aamma ikorfartortit
– Oqalutsit nutserisullu
– ukulu ukiut tamaasa angalanissamut akiliunneqarsinnaapput: Teknikerit
Bilitsit tamakkiisumik akilerneqartarput
SIK-p Feriefondiata aaqqissuussinerit marluusunut tamanut tunngatillugu bilitsinik tamakkiisumik akiliussisoqartarpoq – nunatta iluani ornigassanut imaluunniit Danmarkimut angalanerni tamani.
Aammattaaq angalanermi angallannikkut pissutsit tunngavigalugit aqqutaani allatut ajornartumik unnuisoqartariaqassagaangat tamatumunnga feriefondi akiliussisarpoq.
Tamatumunnga tunngatillugu maluginiarnarpoq sulinngiffeqarluni angalanernut aningaasaateqarfik alla, tassa kattuffiit AK-p, ASG-p aamma PK-p ataatsimoorussamik aningaasaateqarfiat, 2025-mi januaarip aallaqqaataanit atuutilersumik bilitsinik ilaannakortumik akiliussisalermat. Tassa kattuffinnut taakkununnga ilaasortaasut bilitsit akiisa 25 procentiinik namminneq akiliisartussanngorput.
SIK-p Feriefondiata siulersuisui taamatut ilaannakortumik bilitsinut akiliussisalernissamik pilersaaruteqanngillat.