SIK-p Nakkutilliisoqarfia videokkut ataatsimiissaaq

Nakkutilliisoqarfik ukioq manna marsimili ataatsimiittussatut pilersaarusiugaasimagaluarpoq. Marlussoriarluni kinguartitsisoqartareersoq ukiup qaammataani kingullermi ataatsimiilerpoq.

Sisamanngornermi 10. decembari 2020 SIK-p Nakkutilliisoqarfianut aallartitat pernaammik immikkoortitaarlutik inissisimallutik ataatsimiissapput. Tassa coronap nalaani ataatsimiinner­nut killilersuutit pissutigalugit sumiiffinni assiginngitsuni arfilinilinni inissisimallutik videokkut ataatsimiissagamik.

Nakkutilliisoqarfik ukioq manna marsimili ataatsimiittussatut pilersaarusiugaasimagaluarpoq. Taamaalineranili corona nalorninartorsiortitsileruttormat piffissaligaanngitsumik kingu­artinneqarpoq.

Pissutsilli allanngornerinut naleqqussarsinnaanissaq pingaartillugu SIK-p siulersuisuuneri ukioriartornerani aalajangerput Nakkutilliisoqarfik decembarimi ataatsimiigiaqquniarlugu. Tamanna pissaaq kattuffiup immikkoortortaqarfiisa aallartitaasa kommunerisaminni sumiiffinnut aalajangikkanut orniguteriarlutik videokkut ataatsimiinnerisigut.

SIK-p Nakkutilliisoqarfia kattuffiup ukiut sisamakkaarlugit ataatsimeersuartarnerisa akornan­ni ukiut tamaasa naapeqatigiittarfiuvoq. Suliassaasa ilagaat ataatsimeersuarnermi aalajangikkat piviusunngortinneqarnissaat nakkutigissallugu aammalu ataatsimeersuarnerit akornanni SIK-p ingerlatsinera aalajangiiffigisassallugu.

Decembarip qulingani ataatsimiinnissaq 31-nit peqataaffigineqartussaavoq (immikkoortortaqarfiit aallartitaannit siulersuisuunernillu). Ullup qeqqata siorna atorneqassaaq SIK-p siunissami qanoq aaqqissugaanissaanik oqallisigisassat nutaat aallartillugit isumasioqatigiinnermut.