Nakkutilliisoqarfiup ataatsimiinnissaa Sisimiuni pissaaq ulloq 11. apriili 2019. Pappialat ataatsimiissutissat ullumi nassiunneqarput.
Nakkutilliisoqarfiup ataatsimiinnissaa, aammalu pikkorissarnerit paasissutissiinerillu tamanna iluatsillugu ingerlanneqartussat, Sisimiuni kulturip illorsuani Taseralimmi ingerlanneqassapput.
Siulersuisuunerit nalunaarutaat aamma kattuffiup ukiumoortumik naatsorsuutai Nakkutilliisoqarfiup ataatsimiinnerini oqaluuserisassanut aalajangersimasumik ilaasarput. Maannalu ataatsimiinnissamut immikkoortortaqarfinnit oqaluuserisassanngortitat uku ilanngunneqarsimapput:
- Royal Greenlandimi ukioq kaajallallugu sulisoqarsinnaanera SIK-p immikkoortortaqarfiillu ataatsimoorlutik anguniartariaqarpaat, ingerlaannartumik atuutilersumik suliunnaarsitsisarneq akuerineqarsinnaanngimmat.
- Isumaginninnermut Aningaasaateqarfimmit qanigisaq ataaseq kisimi ilaqutariinni akiliunneqartarmat tamanna iluarsineqartariaqarpoq.
- Siulersuisut ingerlatsinermut ataavartumik pikkorissartinneqartalernissaat.
- Sulisut sinniisaat pikkorissartinneqaraangata SIK-p ingerlatsineranut tunngassuteqartunik immikkoortortaqarfiit siulersuisuisa ilaatinneqartalernissaat.
Taakkua saniatigut oqaluuserisassani immikkoortut ilagaat Ôdâq Olsenip Aningaasaateqarfianit kajumissaasiineq aamma “Immikkoortortaqarfitsialammik” toqqaaneq.
Pikkorissarnerit paasissutissiinerillu
Nakkutilliisoqarfiup ataatsimiinnissaa sioqqullugu ulluni marlunni pikkorissaanikkut paasissutissiinikkullu makku sammineqassapput:
1) SIK-p malittarisassaani aalajangersakkat immikkoortortaqarfinnut tunngasut. Taakku sammineqassapput apeqqutit uku aallaavigalugit: “SIK-p immikkoortortaqarfini qanoq atorsinnaavai?” aamma “Immikkoortortaqarfiit namminneq qanoq atorneqarusuppat?“,
2) Siulersuisuunerit anguniagaat piffissamut 2017-2021-imut, aamma
3) SISA-p soraarnerussutiassaqartitsinera pillugu paasissutissat, aamma soraarnerussutisiaqalernissamut aningaasaateqarfiup ataatsimeersuarnera.
Nakkutilliisoqarfiup suliassai makkuupput SIK-p malittarisassai malillugit:
• Ataatsimeersuarnermi aalajangikkat pivisunngortinneqarnissaat nakkutigissallugu.
• Siulersuisuunerit ataatsimeersuarnermi nakkutilliisoqarfimmilu aalajangikkat naapertorlugit sulinerat nakkutigissallugu.
• Ukiumut tulliuttumut ilaasortat akiliutissaat aalajangiiffigissallugit.
• Ataatsimeersuarnerit akornanni SIK-p ingerlatsinera aalajangiiffigissallugu.
• Isumaqatigiinniarnissani piumasaqaatissanik saqqummiussissalluni.
Oqaluuserisassat – SIK-p Nakkutilliisoqarfia 2019 – una tooruk.
Peqataasussat allattorsimaffiat – SIK-p Nakkutilliisoqarfia 2019 – una tooruk.
Programmi – SIK-p Nakkutilliisoqarfia 2019 – una tooruk.
Nakkutilliisoqarfiup ataatsimiinnerata kingornatigut ilanngussaq:
Siulersuisuunerit Nakkutilliisoqarfimmut nalunaarutaat siulittaasumit saqqummiunneqartoq – una tooruk.
