SIK-p siulersuisuunertaavi

SIK-p sulisartut kattuffiattut 23-ssaanik ataatsimeersuarnera ullumi naggaserneqarpoq siulittaasumik, siulittaasup tullianik siulersuisuunernullu ilaasortanik allanik qinersinermik.

Jess G. Berthelsen unammillerteqarani siulittaasutut qinigaaqqippoq. Jokum Zeeb siulittaasup tulliatut qinerneqarpoq (maannamut Uummannami sulisartut peqatigiiffiannut siulittaasuusoq).

Siulersuisuunernut ilaasortat allat tassaalerput: Else Jonna Villadsen (Ilulissat), Sofie Svendsen (Nuuk), Ludvig Larsen (Nuuk), Nuunu Johansen (Aasiaat), Qulutannguaq Berthelsen (Nuuk), Peter B. Mølgaard (Ilulissat) aamma Pele-Knud Mathiessen (Kangerlussuaq).

Aaqqissuussaanikkut politikkikkullu anguniagassatigut oqaluuserisassat arlallit ataatsimeersuarnermi sammineqarput. Soorlu akuersissutigineqarpoq siulersuisuunerit aalajangiussassatut siunnersuutaat nunatsinni aatsitassanik qaqutigoortunik uranitalinnik aatsitassarsiorniarnerit pillugit SIK-p isumaanik erseqqissaataasoq.

Aalajangiussatut oqaaseqaat ima inerniliivoq: ”Aatsitassanik qaqutigoortunik aatsitassarsiorniarnerit SIK-p tapersersorpai, saniatigut tunisassiassatut uranitaqarpata uranitaqanngippataluunniit. Taamatut SIK-p aatsitassanik qaqutigoortunik aatsitassarsiornernut tapersersuineranut naqissuserlugu erseqqissaatigineqassaaq pinngortitamut avatangiisillu eqqarsaatigalugit illersorneqarsinnaassammat, aammalu sulisartut peqqinnissaat suliffiannilu isumannaallisaaneq salliutinneqassalluni.”

Una tooruk oqaaseqaat tamakkerlugu aajumallugu

 

SIK-p siulersuisuunertaavi

Saarliit: Siulittaasup tullia Jokum Zeeb aamma siulittaasoq Jess G. Berthelsen. Tunorliit saamerlermit: Peter B. Mølgaard, Pele-Knud Mathiessen, Ludvig Larsen, Else Jonna Villadsen, Qulutannguaq Berthelsen, Nuunu Johansen aamma Sofie Svendsen.