SIK-p siulittaasuata oqaasii oqaaserinngisaalu

Facebookimi gruppiliortoqarsimavoq qulequtaralugu ”SIK PFA peqatigalugu uran-imut?” Tassani apeqqutitigut arlalitsigut SIK iliuuserisimanngisaanik iliuuseqartinniarneqarpoq aammalu SIK-p siulittaasua oqaaserisimanngisaanik oqaaseqartinniarneqarluni.

Facebookimi oqallittarfiup pilersitsisua aperivoq ilumoornersoq SIK soraarnerussutisiassanik aningaasaateqarfik PFA aqqutigalugu SIK-mut ilaasortarpassuit nalusaannik Kuannersuarnut aningaasaliisimasoq.

Akissut: Naamerluinnaq. Aammami SIK PFA-mut attuumassuteqanngivippoq. Soraarnerussutisiassanik aningaasaateqarfik SIK-mut attuumassuteqartoq tassaavoq SISA. Taannali immikkut siulersuisoqarpoq aatsitassarsiornermullu aningaasaliisimanani.

Aamma apeqqutigineqarpoq SIK-p siulittaasua ”uranimut angertuinnanngorsimanersoq”.

Akissut: SIK-p siulittaasuata angerfigisaa immini tassaanngilaq urani. Angerfigisaa tassaavoq aatsitassarsiorfimmik nutaamik aallartitsinissaq, nunatsinni najugaqartut (aamma SIK-mut ilaasortat) suliffissaqarnerulerniassammata inuussutissarsiornerlu ataatsimut isigalugu siuarsarneqarniassammat – soorunami avatangiisit inuillu peqqinnissaat mianerilluinnarlugit.

Qangali naluneqanngilaq aatsitassaq piiarniagaq uranimik akoqalaartoq – soorlumi aamma aatsitassarsiorfinni allani taamaattoqartaannartoq. Nunatsinnili aatsitassarsiorfinnut avatangiisit peqqinnissarlu pillugit piumasarineqartut sukangaqimmata SIK-p tatigaa aatsitassarsiorneq pilersaarutigineqartoq isumannaatsumik pisinnaasoq.

Torersumik ilumoortunillu tunngaveqarluni pissutsit oqaluuserineqarnissaat SIK-p kissaatigaa.