Annerit marluk siulersuisortaarput siulittaasuili ataannarlutik

SIK-p immikkoortortaqarfii annerpaat marluk – Nuummi Ilulissanilu – ataatsimeersuaq­qam­merput.

Ulloq 14. apriili SIP Ilulissat, 636-nik ilaasortaqarluni immikkoortortaqarfiup annerpaap tullia, immikkut ittumik ataatsimeersuarpoq.

Tassani siulersuisutoqqat amigalersimapput. Taamaariarmallu siulittaasumik siulersuisunillu qinerseqqipput, kiisalu siulersuisunut sinniisussanik sisamanik qinersisoqarpoq, taakku siornatigut marluinnaasarsimagaluartut.

Else Jonna Villadsen amerlanerussuteqarluaqaluni siulittaasutut qinigaaqqipoq. Taamaalilluni piffissami qinersiviusumi nutaami siulittaasuuginnarsinnaanngorpoq. Siulersuisooqatigiligaalu allat tassaapput Peter B. Mølgaard, allatsi Maren Kristensen, Panínguaq Jerimiassen aamma Jørgen Vetterlain.

”Immikkut ittumik ataatsimeersuarneq uummaarissumik ingerlanneqarpoq, qilanaarnarporlu siulersuisunngortut nutaat suleqatigiilernissarput,” Else Jonna Vlladsen taama SIK-mut allappoq. Ataatsimeersuarnermi 55-it peqataasimapput, imaappoq aggiasoqarluarsimavoq.

Ilulissani SIP-mi siulersuisut 14. apriili 2021-mi qinigaasut, saamerlermit: Jørgen Vetterlain, Peter B. Mølgaard, siulittaasoq Else Jonna Villadsen, allatsi Maren Kristensen aamma Paninnguak Jerimiassen.


Ulloq 20. apriili Nuummi NSIP, 943-nik ilaasortaqarluni immikkoortortaqarfinni annersaasoq, ileqquusumik ataatsimeersuarpoq.

Aamma ataatsimeersuarneq taanna ”uummaarissorujussuarmik” ingerlanerarlugu peqataasut unnersiorput. Oqallisigineqarpoq immikkoortortaqarfiup aningaasaatai sulisartut peqatigiiffiata soqutigisaanik siuarsaaniarnermi qanoq atortariaqarnersut.

Josef Therkildsen (Ujoorsi) unammillerteqarani siulittaasutut qinigaaqqippoq – peqataasunit 69-iusunit ersaartaanneqaqaluni.

Josef Therkildsen, NSIP-mi siulittaasutut unammillerteqarani qinigaaqqittoq.


NSIP-mi siulersuisunut ilaasortanngortut tassaapputtaaq siulittaasup tullia Sofie Svendsen, Emma Junge Dalager, Henning Kristensen aamma Mette Sofie Jørgensen.