Upernaap tungaanut sulisartut peqatigiiffiini arlalinni nutaanik siulersuisussarsiortoqarpoq – ilaatigut nikititerlualaaginnarput nutaartaqaalullutik ilaatigullu inuusunnerusut siuttunngornerat malunnarluarluni.
Pisut Upernavimmi februaarimi aallartipput. Tassani siulittaasuugaluartoq Lars Eskildsen AK-mut nuummat siulittaasup tullia Kirstine Kleemann siulittaasunngorpoq. Kirstinellu siulittaasuunera naqissuserneqarpoq peqatigiiffik marsimi ataatsimeersuarmat.
Qaammat taannattaaq Aasianni ataatsimeersuartoqarpoq. Tassani ukiorpassuarni siulittaasuusimasoq Qujana Fleischer taarserneqarpoq Nuunu Johansenimit. Qujanali siulersuisuniiginnarpoq siulittaasumut tulliulluni.
Taamatuttaaq Qeqertarsuatsiaani pisoqarpoq. Tassani Janny N. Møller siulittaasunngorpoq Anda Nathanielsen taarserlugu. Andali siulersuisuniiginnarpoq siulittaasumut tulliulluni.
Uummannami Jørgen Abelsen siulittaasutut Frederik Kristiansenimit taarserneqarpoq, siulittaasulli tulliatut siulersuisuniiginnarluni.
Qasigiannguani Henny Hansen sivisuumik siulittaasooreersimalluni tunuarpoq – Sisimiunut nuuttussanngorami. Siulittaasutut taartigaa Pia Storch Rafaelsen.
Kangaatsiami Åge Motzfeldt siulittaasunngorpoq, manna tikillugu siulittaasuusoq Sakarias Siegstad siulittaasup tulliata issiavianut inissilluni.Ikerasammi Ane-Dorthe Sigurdsen siulittaasunngorpoq Michael Jakobsen taarserlugu, taannalu aamma peqatigiiffiup siulersuisuiniikkunnaarpoq.
Kirstine Kleemann, Upernavimmi siulittaasortaaq.
Nuunu Johansen, Aasianni siulittaasortaaq.
Janny N. Møller, Qeqertarsuatsiaani siulittaasortaaq.
Frederik Kristiansen, Uummannami siulittaasortaaq.
Pia Storch Rafaelsen, Qasigiannguani siulittaasortaaq.
Åge Motzfeldt, Kangaatsiami siulittaasortaaq.
.
Ane-Dorthe Sigurdsen, Ikerasammi siulittaasortaaq.
Qasigiannguani peqatigiiffiup maajimi ataatsimeersuarnerani siulersuisunngortut: Mette L. Nikolajsen (sinniisussaq siulleq), Angutinnguaq Sandgreen (sinniisussap aappaa), Gertrud Lange (allatsi), Karen Rasmussen (siulittaasup tullia) kiisalu siulittaasortaaq Pia Storch Rafaelsen.
Ataatsimeersuarnerit ilaanni pisimasoq: Ole Madsen, ukiorpassuarni Qasigiannguani sulisartut peqatigiiffeqarneranni siuttunut ilaasimasoq, ataqqinaammik ilaasortanngortinneqarpoq. Uani nulii Nukâraq assiliseqatigaa.