SIK-p siulittaasuata tulliata Jokum Zeebip kattuffimmi siunnersortit ilaannik aappaqarluni sinerissami sulisartut peqatigiiffiisa ilaannut ukioq manna tikeraarnissaanut pilersaarut peqatigiiffinnut nassiunneqaqqammerpoq.
Tikeraarnermi siulersuisunik sivikitsumik pikkorissaasoqartassaaq, ilaatigut siulersuisut akisussaaffii, pisussaaffii pisinnaatitaaffiilu sammineqassallutik, aammalu peqatigiiffiit SIK-mi qanoq inissisimanerat pillugu paasissutissiisoqassalluni.
Tikeraaqattaarnermut atatillugu aammattaaq siunertaavoq illoqarfimmi/nunaqarfimmi tikinneqartumi innuttaasunik ataatsimiisitsinissaq. Aamma sulisut sinniisaannik ataatsimeeqateqarnissaq kiisalu suliffeqarfinnut pulaarnissat pilersaarutaapput.
Tassa peqatigiiffiit matuma ataani allattorneqartut 2022-mi tikeraarneqarnissartik naatsorsuutigisinnaavaat.Taamaalillutik peqatigiiffiit affangajaat ukioq manna tikeraarneqarsinnaassapput. Taava aappaagu 2023-mi sinneri taamatut tikeraarneqassagaluarput.
Nuuk: Marsi
Allattoqarfimmit peqataasussaq: Emma J. Dalager
Sisimiut aamma Kangerlussuaq: Apriili
Allattoqarfimmit peqataasussaq: Inge-Marie J. Rosing
Paamiut: Apriili
Allattoqarfimmit peqataasussaq: Emma J. Dalager
Qeqertarsuatsiaat: Maaji
Allattoqarfimmit peqataasussaq: Emma J. Dalager
Ittoqqortoormiit: Maaji
Allattoqarfimmit peqataasussaq: Inge-Marie J. Rosing
Uummannaq aamma Ikerasak: Juuni
Allattoqarfimmit peqataasussaq: Sofie Svendsen
Narsaq aamma Nanortalik: Juuni
Allattoqarfimmit peqataasussaq: Susanne Olsen
Attaveqaatinik pikkorissaanissaq
Illoqarfinni nunaqarfinnilu SIK-mut atasunik peqatigiiffeqanngitsuni attaveqaatinik toqqartuineq maanna ingerlanneqarpoq. Attaveqaatinillu pikkorissaanissaq ukiaru septembarimi pisussatut eqqarsaatigineqarpoq, sumili pinissaa suli aalajangerneqarnani. Tassani siunnersorti Sofie Svendsen siulittaasullu tullia pikkorissaasuussamaarput.