Ukiorpassuarni SIK-mut sullissisarsimasoq, Stephen Heilmann, arfininngornermi 1. juuni 2019 toquvoq. SIK-p siulittaasua Jess G. Berthelsen eqqaaniaalluni ima oqaaseqarpoq:
Ikinngutigilluagarput aammalu SIK-mi suleqatigilluarsimasarput Stephen Heilmann arfininngormat toqukkut qimaguppoq. Ukiuni inuuffigisamini 77-ini namminissarsiunngitsumik periaaseqarluni inoqatiminullu asanningaarluni Kalaallit Nunaanni inuiaqatigiit akornanni sulisimanera qujamasuutissaavoq.
Stephi siullermik SIK-p 1988-imi ataatsimeersuarnerani aqutsisoraarput. Taamanikkut SIK-mi ularussineqaleruttorpoq, oqaatigisariaqarporlu ataatsimeersuarnermik aqutsilluarnera pissutaalluni ataatsimeersuarneq iluatsilluarmat.
Tassalu Stephi 1988-imiilli SIK-p ataatsimeersuarnerini aqutsisuusarsimavoq nammineq kissaateqarnermigut 2013-imi kingullermeerluni.
Taamaattumik Stephi aamma SIK-p oqaluttuarisaaneranut pingaarutilittut oqaatigisariaqarpoq.
Tassami nalunngilarput sumiluunniit ataatsimeersuarnerni aqutsisoq ataatsimeersuarnerup iluatsilluarneranut imaluunniit iluatsinnginneranut pissutaalluinnaqqissaartartoq. Taamaattumik isumaga naapertorlugu 2013-ip tungaanut SIK-p ataatsimeersuarneri torersumik naammassineqartarsimapput Stephip aqutsilluarneratigut.
Taamaattumik aamma Stephi immikkoortortaqarfiit siuttuinik ilisarisimannitserpassuaqarpoq, aammalu immikkoortortaqarfinni kikkut qanoq inissisimanersut ilisarisimalersimallugit.
Tassalu Stephip piginnaasarpassuisa ilagilluinnarpaa inoqatiminut tusarnaarsinnaaneq, aammalu inoqatiminut immikkoortitsinngilluinnarluni kinannguuppat kinarsuuppalluunniit assigiimmik inoqatini piniartarpai.
Pisinnaasarpassuisa ilagilluinnarpaat nunatta oqaluattuarisaaneranik ilisimasaqarluartuugami politikkikkullu malinnaasuulluni. Taamaattumik qanga pisimasunik aperisassaarukkaangatta Stephi attavigiuartarparput, aperalugu qangamaa ukiorlu suna pisimasoq.
Taamaattumik aamma una nuannaaralugu oqaatigisariaqarpoq Ilisimatusarfimmi saqqummiisoq aperineqarsimammat ”Stephi qanoq-una ilillutit qanga pisimasorpassuit eqqaamasinnaavigit?”, akisimavorlu ”seniiliugama qanga pisimasut eqqaamasinnaavakka, kisianni ippassaq pisimasut eqqaamasinnaanagit.”
Stephip ikinngutitut suleqatitullu maani nunamiikkunnaarnera maqaasinassaqaaq, ilami alakkarlugu anersaartorfissat ilagiuarsimammassuk.
Stephen Heilmannip eqqaaneqarnera ataqqinartuuli.
Jess G. Berthelsen, SIK-p siulittaasua
