Ukiup 2023-p qaammataata siulliup aallartinnerani suliniutinik pingaaruteqartunik sulisartut kattuffiata iluani suleqatigiinnermut nukittorsaataasunik taasassaqalereerpoq.
Siullermik, Sisimiuni sulisartut peqatigiiffiata aningaaserissunneqarnera 1. januaari 2023-mit SIK-p allattoqarfianit isumagineqalerpoq.
Aappassaanik, Nuummi peqatigiiffiiup allattoqarnikkut sullinneqarnissaanik isumaqatigiissut suli ukiumi ataatsimi atuuttussanngortinneqarpoq.
Pingajussaanik, kattuffiup siulittaasuata tulliata peqatigiiffinnut tikeraaqattaarnini ilaasortaqarnikkut nukittorsaanissamik siunertaqartoq qaammammi uani nangissavaa.
Sisimiormiut aaqqissuussinermut ilanngupput
2013-imi SIK-p ataatsimeersuarnerani aalajangiinikkut sulisartut peqatigiiffii kattuffiup allattoqarfiata aningaaserinikkut sullissineranut ilanngussorput. Taamatut aaqqissuussisoqarpoq peqatigiiffiit aningaasaqarnerisa assigiiaarnerusumik isumannaannerusumillu aqunneqarnissaat siunertaralugu, taamalu aamma aningaasaatigineqartut atorluarneqarnerunissaat qulakkeerniarlugu.
Aaqqissuussineq misilittagaqarluarfiuvoq angusaqarfiulluarlunilu. Taamaattumillu kattuffiup allattoqarfiata nuannaarutigaa maanna januaarip aallaqqaataanit aammattaaq Sisimiuni peqatigiiffik aningaaserissussinnaaleramiuk. Tamanna pivoq allattoqarfiup peqatigiiffiullu siulittaasuata Jens Johansenip 2022-mi tamatuminnga isumaqatigiissuteqarnerata kingunerisaanik.
Sisimiut ilanngunneratigut peqatigiiffiit 20-usut tamakkerlutik aningaaserissussinikkut aaqqissuussinermut peqataalerput.
Tina L. Nielsen SIK-p allattoqarfiani naatsorsuuserisuuvoq. Taanna aningaaserissussinikkut sulisartut peqatigiiffiinut sullissisuuvoq. Sisimiuni sulisartut peqatigiiffiata aaqqissuussinermut ilanngunneratigut peqatigiiffiit 20-usut tamarmiullutik tamatumani peqataalerput.
Nuummiut SIK-p allattoqarfianit sullinneqaannassapput
Kattuffiup allattoqarfiata Nuummi sulisartut peqatigiiffiat isumaqatigiissuteqarfigisimavaa taassuma allattoqarnikkut sullinneqarnera 2023-mi ingerlaannassasoq.
Taamaalilluni kattuffiup allattoqarfia peqatigiiffiup siulersuisuinik sullississaaq soorlu suliffeqarfinnut pulaaqattaarnerit pilersaarusiorlugillu ingerlanneqartarnerini, sulisut sinniisaasa ataatsimiisinneqartarnerini, siulersuisut ataatsimiinnerini ilaasortallu ataasiakkaat sullinneqartarnerini.
Aammami taamatut aaqqissuussineq tulluaannarpoq, tassami peqatigiiffiup ilaasortaasa ilarpassui SIK-p allattoqarfianit ulluinnarni sullitarineqarmata, aammalumi illorsuarmi ataasiusumi kattuffik peqatigiiffillu allaffeqarmata.
Tikeraaqattaarneq nangissaaq
Ataasinngornermi 9. januaari SIK-p siulittaasuata tullia Jokum Zeeb siunnersorti Susanne Olsen ilagalugu Qaqortumukassaaq.
Taamaalilluni tikeraaqattaarneq 2022-mi ingerlassimasani ukioq manna naammassiumallugu tikeraagassani siulleq ornissavaa.
Tikeraarnermi siulersuisunik sivikitsumik pikkorissaasoqartassaaq, ilaatigut siulersuisut akisussaaffii, pisussaaffii pisinnaatitaaffiilu sammineqassallutik, aammalu peqatigiiffiit SIK-mi qanoq inissisimanerat pillugu paasissutissiisoqassalluni. Aammattaaq siunertaavoq illoqarfimmi/nunaqarfimmi tikinneqartumi innuttaasunik ataatsimiisitsinissaq. Taamatuttaaq sulisut sinniisaannik ataatsimeeqateqarnissaq kiisalu suliffeqarfinnut pulaarnissat pilersaarutaapput.
Tikeraaqattaarnissamut pilersaarut nittartakkami matumani piaartumik saqqummiutissavarput.