”SIK-p nersornaasiuttagaa immikkut ittoq” ukioq manna maajip aallaqqaataani suliffeqarfinnut marlunnut tunniunneqarpoq, tassa Perorsaanermik Ilinniarfimmut aamma Polar Seafoodimut.
Ilulissani sulisartut peqatigiiffiata siulittaasuata Else Jonna Villadsenip nersornaat Perorsaanermik Ilinniarfik/Socialpædagogisk Seminarium-imut tunniuppaa. Tamanna pivoq maajip aallaqqaataasiorluni katerisimaarnermi, diplomimik tigusisuulluni ilinniarfimmi ilinniartitsisoq Sikkersoq Mathæussen.
Ilinniarfiup Ilulissaniittup suliffeqarfitsialattut toqqarneqarneranut tunngaviusut diplomimi tunniunneqartumi allassimasut erseqqilluarput, imaattut:
”Sulisunut atugassarititaasut ersarissut. Sulisut atorfininnermut isumaqatigiissutillit. Sulisut ataatsimoortinneqartartut suliassanullu ilitsersorneqarluartut, pikkorissarnernut piginnaanngorsaanerit ataavartut. Sulisitsisut sulisunut ataqqinnittut pingaartitsisut isumaqatigiissutinullu ataqqinnittut. Ilisimatitsissutit paasissutissiinerillu ataavartut. Suliffeqarfik silaannarissoq. Aamma sulisunut sinniisoqartitsisoq.”
Perorsaanermik Ilinniarfimmut “Suliffeqarfitsialattut” nersornaasiussamik tigusisuuvoq tassani ilinniartitsisuusoq Sikkersoq Mathæussen.
Polar Seafood Nuummi Katuami maajip aallaqqaataasiorluni katerisimaarnermi nersornaaserneqarpoq, tigusisuulluni Miki Brøns.
SIK-p siulittaasua Jess G. Berthelsen oqarpoq Polar Seafood nunatsinni annertuumik suliffissaqartitsisoq, tamatumani immami nunamilu katillugit 900-nik suliffissaqartitsigami. Oqaatsini nangippai:
„Nunami suliffeqarfiutai eqqarsaatigalugit sulisuminnut aammalu isumaqatigiissutinik ataqqinninnerat assut iluarpoq.
Coronap nalaani saaffigineqartillutik isumaqatigiissutinik ataqqinneqqissaarlutik suleriaaseqarput. Soorlu sulisoq coronarpat angerlartinneqassaaq aningaasarsiai pigitiinnarlugit, kiisalu meeraat napparsimasimappata aamma sulisut meeqqaminnik paarsitinneqartarput aningaasarsiatik pigiinnarlugit.
Taanna pingaartillugu taavara. Tassa pisortat kommunillu suliffeqarfiutaat aalajangersakkamik tamatuma assinganik taamatullu atortussamik aamma peqaraluarput, coronali aallarteqqaarmat tamatuma iluamik atorneqannginnera ajornartorsiutigisimavarput. Kisianni Polar Seafoodip saaffigineqarnaniluunniit tamanna isumaqatigiissutaammat aaqqiivigipallassimavaa.
Taanaannaanngilaq, arlaatigut sulisunut tunngatillugu ajornartorsiuteqartoqaleraangat aaqqiisoqarnissaa sulissutigipallattarpaat, aammalu arlaatigut ikkarnartoqarsimappat namminneq saaffiginnittarput.
Assersuut ataaseq kusanartoq: Sulisoq ukiuni arlalinni nukersorluni aalisakkerivinni allanilu sulisarsimasoq (tassami aalisakkerivinni sulineq nukersornarsinnaasarmat) malugigamikku nukersorsinnaanera killeqalersoq soraarsipajuinnarnagu eqaatsumik aaqqiipput suliassaanik oqinnerusumik tunillugu. Taannaannaanngilaq. SIK-mit maluginiarsimavarput aalisakkerivinni pigisaminni piginneqataaffigisaminnilu sulisunut isumaqatigiissuteqarnissaq assut pingaartikkaat. Tamannalu SIK-mut sulisunullu aammalumi sulisitsisunut pingaaruteqarpoq, tamanna toqqissisimatitsisarmat.“
Miki Brønsip suliffeqarfitsialattut nersornaatit ukioq manna tunniunneqartut marluusut aappaat Polar Seafood sinnerlugu tiguaa. SIK-p siulittaasua tunniussisuuvoq.