Ileqquusoq malillugu sulisartut ulluanni maajip aallaqqaataani SIK-p siulittaasua suliffeqarfitsialammut SIK-p nersornaasiuttagaanik immikkut ittumik tunniussivoq. Tamatumuuna Air Greenlandimut ataqqinaat tamanna tunniunneqarpoq.
Allagartaq tamatumunnga uppernarsaat Jess G. Berthelsenip direktør Jacob Nitter Sørensenimut aamma sulisoqarnermut pisortamutf Mads B. Christensenimut tunniukkamiuk imaattumik oqaaseqarpoq:
“Ukiormanna siulersuisuunerit aaliangerput Air Greenland suliffeqarfitsialattut toqqarniarlugu makkua tunngavigalugit: Sulisuminnut: ataqqinnittuupput, paarsersuttuupput, pikkorissartitserusupput, minnerunngitsumillu sulisutik arlaatigut qanoq iliuuseqarfigissagunikkit taakkuupput isumasiorniarluta SIK-mut saaffiginnittartut.
Suleqatigiilluarnitsinnut peqqutit ilagilluinnarpaat isumaqatigiinnialernermi imalunniit isumaqatigiinniarnermi taamaallaat naapinneq ajoratta, tamannalu nuannaarutigisarparput. Air Greenlandip paasisimavaa sulisut tigummiinnarnissaat qanoq pingaaruteqartiginersoq, sulisullu taakkuusut suliffeqafiup ingerlalluarnissaanut tunngaviliisuulluinnartut. Nalugunanngilarpummi sulisut paarlakaappallaaleraangata suleqatigiinnut sullitanulluqanoq sunniuteqartarnersoq, taamaammat suliffeqarfik pitsaasumik kiffartuussiniartilluni sulisut aalaakkaasut pingaartittarpai.
Miinnerunngitsumik mittarfissuit saneqarnerisa aammalu naammassiartornerisa nalaani sulisut tigummiinnarnissaat anguniarlugu Air Greenland annertuumik suliniuteqarpoq. Mittarfiliorneq aallartilaaginnartoq SIK-mut saaffiginnipput immikkuullarissumik isumaqatigiissuteqarusullutik Air Greenlandip sulifeqarfiutaasa Nuummut aammalu Ilulissanut nuunneqarnissaannut atatillugu.
SIK-mi isumarput naapertorlugu Air Greenland annertoqisumik sulisut tigummiinnarnissaat siunertaralugu suliniuteqarpoq, tamatumani sulisut inissaannik, pequtaasa nassiunneqarnissaat, sapinngisannguartillu taamat anguiniarsimavaat Nuummut Ilulissanullu nutsilerunik sulisooreersut amerlanerpaartaat nassarnissaat. Tamannalu iluatsilerpasippaat. Taamatut iluatsitsilernerannut peqqutaaqataanngitsuunngilaq sulisut, Air Greenland suliffigissallugu nuannarigamikku.
Taamaammat ukiormanna suliffeqarfitsialammik toqqaanialeratta nalorninngilagut. Air Greenland qujanaq sulisunut ulluinnarni ataqqinnillusi iliuuseqartarnissinnut. Qujanarlu attavigilluartaratsigut, minnerunngitsumillu sulisut sinnerlugit qujarusuppugut Kangerlussuarmiik nutsernissassinnut tunngatillugu sulisut sapinngisamik tamaasa nassarniarsimagassigit nuuffissassinni periarfissillugit.
Pilluaritsilu suliffeqarfitsialattut toqqagaagassi!”
Allagartaq “Suliffeqarfitsialattut” toqqagaanermut uppernarsaat SIK-p siulittaasuata direktør Jacob Nitter Sørensenimut aamma sulisoqarnermut pisortamutf Mads B. Christensenimut tunniuppaa.