Sulinngiffeqarluni angalanissat atunngitsoorsimasat 2021-mi atornissaannik neqeroorut

Coronap nalaani pissutsit immikkut ittut atuunnerat paasillugu SIK-p Feriefondia periarfisseeru­sup­poq 2020-mi angalanissaraluaminnik atuinngitsoortut 64-it 2021-mi angalanissaannut. ​

Ilaqutariit 64-it SIK-p Sulinngiffeqarluni Angalanermut Aningaasaateqarfianit neqe­roor­fi­gi­­ne­­qar­put ukioq manna angalanissaraluatik atunngitsuukkatik 2021-mi atorsinnaa­gaat.

Coronap nunani tamalaani tunillaassuutilernerata kingunerisaanik pissutsit atuutilersut immikkut ittut inunnut angalaniaraluartunut toqqissisisimajunnaarsitsisimapput.

Taamaalillutik 2020-mi ilaqutariittut angalanissamut SIK-p Feriefondianit makitaasimasut 559-iusut ilarpassui aallanngitsoorsimapput. Ilaasalu angalanissaminnut pissutsit ilorraap tu­ngaanut aallarnissaat utaqqimaarpaat – sunaaffali pissutsit imaannaq iluarsiartussanngit­sut.

Pissutsit immikkut ittut atuunnerat paasillugu SIK-p Feriefondia periarfisseeru­sup­poq 2020-mi angalanissaraluaminnik atuinngitsoortut 2021-mi atuinissaannut.

Feriefondi ilaqutariinnut pineqartunut 64-inut nalunaaruteqaqqammerpoq. Neqeroorut atorusukkunikku immersugassaq nassiunneqartoq immersussavaat, taannalu kingusin­ner­paamik ­15. januaari 2021 Feriefondimut nassiunneqassaaq.